JOHANNESBURG................. Inhlanganiso elwela amalungelo oluntu eye Amnesty International ithi ziyanda izehlakalo zokwephulwa kwamalungelo oluntu eZimbabwe ngesikhathi ilizwe lilungiselela ukhetho. Lokhu kuvezwa ngumbiko wale inhlanganiso owethulwe eJohannesburg.
Ekhuluma emhlanganweni wabezindaba ngesikhathi linhlanganiso isethula umbiko wayo ka2022/23, osaphethe isikhundla somsekeli womqondisi wale inhlanganiso ezansi yezwekazi leAfrica unkosikazi Vongai Chikwanda uthe kubelokwephulwa kwamalungelo oluntu kakhulu eZimbabwe.
Lokhu kugoqela ukubotshwa kwenkokheli zamabandla aphikisayo okubalisa lomnumnzana Job Sikhala owebandla leCitizens Coalition for Change osekusiyaphela umnyaka evalelwe kodwa kungelacala asetholakele elalo.
“Ukubotshwa mahlayana lokuhlunyezwa kwamalunga ebandla eliphikisayo, intatheli zindaba labalwela amalungelo oluntu ngezinye zezinto esikhathazeke ngazo eZimbabwe.”
Lumbiko uveza njalo ukuthi uhulumende weZimbabwe usebenzisa umthetho wezebulenjini be internet, iCyber and Data Protection Act, ukubopha intathelizindaba mahlayana.
Ubika njalo ukuthi kulembuthano yebandla leCCC echithwe ngodlakela olukhulu ngabacatshangelwa ukuthi ngabebandla elibusayo eleZanu PF.
Ukubotshwa kwabafundi abebenkankasela ukwehliswa kwemali abayihlawulayo emauniversity ngoMpandula nyakenye ngokunye kwezinto ezisolwa yilo umbiko. Isenzo samapholisa sokubopha amalunga enhlanganiso eququzela ukuvota eyeZimbabwe Election Support Network ngoNhlolanja lakho kuqukethwe yilo umbiko.
Kusolwa njalo ukubulawa kukamnumnzana Tawanda Zvinowanda owafela ezandleni zamapholisa ngoNcwabakazi ngemva kokubotshwa eziphilele emzini wakhe eChitungiza.
Osaphethe isikhundla somqondisi weAmnesty International eSouthern and East Africa umnumnzana Tigere Chagutah, uthi baququzela ohulumende ukuthi baqakathekise ukulondoloza amalungelo oluntu.
“Ohulumende bonke balomlandu wokuvikela lokulondoloza impilo lamalungelo oluntu ezizalwane zabo.“
Kusenjalo imizamo yokuthola ukuphawula kukahulumende weZimbabwe ngalo umbiko ibingakaphumeleli. Kodwake umongameli Emmerson Mnangagwa useke wakubeka kwacaca ukuthi imbiko yokuthi uhulumende wakhe wephula amalungelo oluntu ngamanga aluhlaza ayimizamo yokuzama ukufaka ubutha phakathi kwezizalwane zeZimbabwe.
Umkhokheli webandla le CCC umnumnzana Nelson Chamisa useke wavezela abezindaba ukuthi usebhalele umongameli ukuthi angenele edabeni lokubotsha komsekeli kamgcinisihlalo waleli bandla umnumnzana Job Sikhala, kodwa kayikho impendulo asethe wayithola ngalesi sicelo.
