WASHINGTON DC - Umsakazo kamabonakude oweAl-Jazeera ngoLwesine wethule ifilimu eveza imisebenzi yenkohlakalo enziwa yiziphathamandla zikahulumende ekuthengisweni kwegolide pandle kwelizwe.
Iziphathamandla lezi zingena elizweni lemali engcolileyo, engatholakalanga ngendlela eqondileyo, zisebenzelana lezigilamkhuba zibe seziyisebenzisa ukuthenga igolide eZimbabwe beseziphuma lalo zisiyalithengisa kweleDubai.
Kulifimilu, isikhonzi sikaMongameli Emmerson Mnangagwa eEurope laseAmericas, uMnu Eubert Angel, ukhuluma lentathelizindaba zeAl Jazeera ezitshaya isifuba ngenkohlakalo le njalo ezitshela ukuthi uMnangagwa uyakwazi konke okwenzakalayo.
UAngel wayengakwazi ukuthi intathelizindaba lezi ziyawathapha amazwi akhe kanye le-video.
Intathelizindaba lezi zazilande uAngel ngesikhathi eseGlasgow ehamba loMnangagwa ngo2021, zisithi ziyizigilamkhuba zakweleChina ezilemali engena kuzigidi lezigidi zamadola eMelika eziyithole ngendlela engalunganga ezifuna ihanjiswe eZimbabwe ukuyathenga igolide ukuze le kube yimali etholakale ngokusemthethweni.
UAngel uphuma kulifimilu etshela intathelizindaba lezi ukuthi lokho yinto elula njalo uyenelisa ukuyenza ngoba njengesikhonzi sikaMnangagwa, akulamuntu ozambuza kumbe ukukhwathaza izikhwama zakhe nxa engena eZimbabwe.
"Ufuna igolide, singakwenza njengamanje, singakwazi ukutshaya ucingo khathesi kwenzeke," kusho uAngel etshela intathelizindaba zeAl Jazeera.
“Izafika eZimbabwe [imali], iZimbabwe ngeke ikwazi ukuyithinta ngize ngifike mina endlini yami. Ngakho-ke, kungaba lohlelo lokusebenzelana... kuyinto elula kakhulu.”
UNkosikazi Henrietta Rushwaya, yena oke wabotshwa ezama ukuphuma legolide ngudlu elizweni laye uyathinteka kuloludaba. Abanye ngababikwa besaziwa kundaba zokuthenga lokuthengisa igolide, uKamlesh Patten, Ewan Macmillan, Simon Rudland labanye.
Umsakazo weAl Jazeera uthi abanye balababantu bayakulandula ukuthi bakhohlakele. IStudio 7 yehlulekile ukuxhumana labo.
Kodwa uNkosazana Rushwaya yena uthe uzakhuluma kusikhatshana esilandelayo nxa amanye amahlandla efilimu le amathathu esesakaziwe.
Ibhanga elikhulu lelizwe eleRBZ lazise ngoLwesithathu ukuthi seliphenya inotho kaAngela lakaMacmillan. Ilunga leZanu PF, uMnu Believe Gaule, utshele iStudio 7 ukuthi uMongameli Mnangagwa kumele axotshe bonke abakuhulumende wakhe abathinteka ku-video le.
Ingcwethi kwezombusazwe uMnu Effie Dlela Ncube laye uthi ngempela uMnangagwa kumele athathe amanyathelo nxa ezimisele ukulwisana lenkohlakalo.
