Lamhlanje kweleSouth Africa indawo ezinengi bezivaliwe amabhizimusi, izitolo, izikolo, amahofisi kahulumende lezinye indawo ezinengi ezidingwa nguzulu empilweni yansukuzonke.
Lokhu kulandela inkuthazo yebandla leEconomic Freedom Fighters elikhuthaze umphakathi ukuthi engayi emisebenzini njengendlela yokutshengisela ngokoma kwempilo, ukusweleka kwamandla kagetsi, ukuphela kwemisebenzi, ubuyanga lokunye okuthinta impilo yabantu nsukuzonke.
Imigwaqo eminengi edolobheni leJohannesburg ibitshaya umoya phose indawo zonke zivaliwe. Bekuyisimo esifanayo emadolobheni amanengi elizweni jikelele.
Ekhuluma labasekeli bebandla lakhe abafole emigwaqweni belubhelise emahofisini kaMongameli Cyril Ramaphosa ePretoria, umkhokheli webandla leEFF, uMnu. Julius Malema, uthe ukutshengisela kwabo lokhu ngokuzihlalela ezindlini kuphumelele okwedlula konke osekuke kwabakhona kwele South Africa.
Konke kume kwathi khwimilili ngemva kwenkuthazo yethu yokuthi abantu bazihlalele ezindlini bengayi emisebenzini. Bekuvalwe yonke into kugoqela lezikolo, amabhizimusi, lamahofisi kahulumende.
Isizalwane sakwele South Africa, uMnu. Tsietsi Lupale, utshele iStudio 7 ukuthi basekela ngokugcweleyo ukuvalwa kwezinto zonke elizweni njengoba kukhanya kuyiyo yodwa indlela engenza uhulumende alungise izinto elizweni.
“I-loadshedding iyasichaphaza kakhulu ngoba inamastage amanye. Ngendlea abasitreater ngayo asicabangi ukuthi basitreater fair. Asikwazi ukuthi kuqale kuphi and kuzacina kuphi. Kayehle esihlalweni sakhe yiyo into esiyifuna lamhlanje.”
AbeZimbabwe labo ababhekane lobunzima obuhlangana lobezizalwane zakweleSouth Africa lezi labo bamukele ngezansdla zombili ukutshengisela lokhu besithi yikho okufanele kwenziwe emazweni wonke ezwekazi leAfrica.”
Isizalwane seZimbabwe, uNkosazana Mavisi Nkomo, uthi akufanelanga kwekelwe lokhu okwenzakala eSouth Africa.
“Lathi siyakusekela lokhu okwenzakala eSouth Africa yikho silana. Silapha in solidarity with South Africans ngoba iproblems abahlangana lazo we are still facing the same things. So, we are in solidarity sisithi uRamaphosa nxa engasakhoni ukubusa ilizwe akatshiye.”
ISouth Africa ibhekane lokusilela kwemisebenzi, ukoma kwempilo lobuyanga osebubhahile. Ukusilela kwamandla kagetsi sekufike kusibanga sokuthi abanye bahlala okwamahola edlula alitshumi bengelamagetsi.
Uhulumende, amabandla abephikisana labosomabhizimusi bebengakaphawuli ngomonakalo obangelwe yikutshengisela lokhu njengoba ibandla leEFF lithe kuzaqhubeka kuze kube phakathi kobusuku lamhlanje.