HARARE - Uhulumende weZimbabwe usebumbe ikhomithi ezakhangelisisa udubo lwendawo ezipakwa izimota enzikini yedolobho leHarare.
Lokhu kuza ngemva kokuba abantu abanengi bekhalaze ngokuthi izisebenzi zohlangothi olubona ngemithelo okumele ikhitshwe ngabatshayeli ukupaka izimotha ziyabahlukuluza ngokuba lamaqinga okuthi babhadalele indleko ngemali enengi elingana lomholo wenyanga yonke kwabanye ephezu kwamadola alikhulu eMelika.
Umphathintambo wembuso yezabelo, uMnu. July Moyo, ukhiphe umbiko ngoLwesihlanu esithi usebumbe ikhomithi elabantu abahlanu eyokuhlolisisa udaba lolu.
Uzulu we Harare uyakhonona ngembadalo yokupaka izimota edolobheni leli esithi kayihambelani lomumo womnotho oselizweni.
UMnu. Hebert Zulu, ohlala eHarare, uthi loba nje uhulumende esebeke likhomithi kumele akhangelisise ukuba imali le ihambelana lo mnotho welizwe na?
“Imali ebhadaliswa uzulu we Harare sibona engani kumele ilungisiswe ngoba nxa sikhangela isimo selizwe asihambelani lalokho okuselizweni”
Lokhu kusekelwe nguMnu Nobert Dube ohlala eHarare yena othi uhlutshwa zindleko zokubhadalela lapho abapaka khona izimotha.
“Imali yokutshiya imota inengi. Kodwa okuhluphayo yikuba abatholakali abantu be City park ngesikhathi sitshiya izimota zethu kuleli”
UMnu Liberty Sithole yena uthi kumele kulinganiswe ukuthola kwe khansili imali lokuba amalungelo kazulu ayahlonitshwa.
“Kumele sibone ukuba siyalungisa amalungelo kazulu ngasikhathi sinye ikhansili ithola imali. Nxa singalungisanga lokhu akusoze kuhambe kuhle”
Embikweni esisabalale ezinkundleni zebulenjini ezeWhatsapp leTwitter iveza ukukhonona kwabantu abanengi besithi ngezikhathi ezinengi azitholakali izisebenzi okumele ubhadalele kizo ndleko yokupaka imotha.
Umuntu engatshiya imotha ingabadalelwanga aphiwe okuliphetshana kokuveza imali oyihlawulileyo, uyathi esephenduka afice sebebophe amavili emotha ngamakhethani awe clamp.
Ukuze abekhansili bakhiphe leyo clamp kuzamele ihlawulelwe amadola eMelika aphezu kwekhulu-US$132 ukuthi ikhitshwe ikantike kumele umuntu abhadale ngedola leZimbabwe elingamakhulu athobamunwemunye-ZW$900, okuyimali elingana elilodwa leMelika. Leyi ayisiyo ndleko enkulu kodwa udubo basuka bengabi khona okumelele umuntu abhadalele lelo dola kulokucina abatnu sebehlawuliswa amadola aphezu kwekhulu.
Usodolobho weHarare uMnu Jacob Mafume ngemva kokubona imbiko yokukhonona yezakhamizi lezethekeli zaleli dolobho esisabalala ezikhundleni zebulenjini, ucine ephendula ngokubhala ekhasini lakhe lenkundleni ye Twitter ukuba bazakhangelisisa ngodaba lolu evumelana labantu ukuthi imali ebhadaliswa uzulu inengi kakhulu.
Abahlanu ababumba ikomiti yokuhlolisisa lolu daba abakhethwe nguhulumende, ngabathi uMnu Mutambanengwe, okugatsha lwezokuhambisa kuhulumende, uMnu Mungure owedolobho le Harare, uDokotela Marufu, uNkosazana Hlatshawayo lo Mnu Gopozah iqgwetha lika Hulumende.(Please put their first names the members of the committee). Uhulumende uthi abahlanu laba kumele bahlolisise ukuba abekhansili imali leyi bayisa ngaphi njalo ukuba iyahambelana na lalokho okwenzakala kwele Zimbabwe.