Ingcwethi ezicubungula ezomnotho zithi eleZimbabwe likhanya lokhe liqina ngokusebenzisa idola leMelika okugoqela lohulumende osevumela ingatsha zakhe ukuthi zibhadalise ngalo. Uphenyo olwenziwe luhlangothi olweZIMSTAT luveze ukuthi ukusetshenziswa kwedola le Melika sekuyisilinganiso sokungamatshumi ayisikhombisa lengxenye ekhulwini-75%, elizweni jikelele.
Osomabhizimusi kanye lengcwethi zezomnotho bathi sebenanzelele ukuthi laye uhulumende akasalikhwabithi idola le Zimbabwe elilokhu lisehla isisindo nxa liqathaniswa ledola leMelika.
UMnu. Effort Ncube umqondisi weNational Consumer Rights Association (NACORA) uthi uhulumende kumele avume mgceke ukuthi imali yakuleli ayisasebenzi.
"Iqiniso yikuthi imali yeMelika sekuyiyo ethenjiweyo kwezomnotho, lohulumede weZimbabwe kayifuni imali yeZimbabwe osomabhizimusi abayifuni kanye lezisebenzi yingakho incipha ukusebenza kwayo ngoba akula muntu oyifunayo.Kumele khonalokho kufakwe ezingqondweni zabantu abathatha izingqumo kuhulumende bakwazi ukuthi imali le abathi isetshenziswe ayisebenzi."
lsikhulumeli senhlanganiso yababalisi eyeAmalgameted Teachers Union of Zimbabwe (ARTUZ) uMnu. Thembakuye Moyo uthi idola leMelika yilo elisebenzayo eZimbabwe.
“Singakhangela iZimstat inakanela ukuthi kundleko zonke zelizwe ziyi76% emali yase Melika nxa ungaphuma ezitaladeni ufuna ukuthenga uzathola ukuthi imali abayibizayo lidola.Okusuka kusimangalise lanxa kungasitshayisi ngovalo yikuthi uhulumende kafuni kuvuma ukuthi idola laseAmelika yilo eselisebenza okusemthethweni."
UMnu. Stevenson Dhlamini ingcwethi kwezomnotho lamabhizimusi njalo efundisa ngezomnotho ekolitshini leNational University of Science and Technology (NUST) uthi umumo wezomnotho elizweni uveza sobala ukuthi idola le Zimbabwe lokhu liqhubeka lisehla amandla alo ngesiqhubu esethusayo nxa liqathaniswa leleMelika.
"Siyananzelela ukuthi nxa sikhangela umumo womnotho ilizwe jikelele sinanzelela ukuthi sekuvame ukusetshenziswa imali yakwamanye amazwe njengoba kuvele kwacaca kulabo abakhangela ezama statistics elizwe bayananzelela ukubana amatshumi ayisikhombisa lasithupha ekhulwini yezindleko ezikhona sezibhadalwa ngemali yamanye amazwe lokhu kuvamisa ukuthi sekuqhele ukusetshenziswa kwemali yamanye amazwe ukwedlula eyakithi lokhu kungabe kubangelwa ezitshiyeneyo, okokuqala yikuthi njengelizwe seyame kakhulu kwamanye amazwe ukubana sithole impahla ezithengiswayo elizweni lakithi okudal ukuthi kufunakale imali yakwamanye amazwe."
Uhlangothi lukahulumende olubona ngenombolo zelizwe, olwe Zimbabwe National Statistics Agency ichaza ukuba imali yangaphandle kwelizwe isebenza okwesilinganiso esingamakhulu ayisikhombisa lanhlanu ekhulwini (75%) kwele Zimbabwe. Isilinganiso sokukhuphuka kwentengo yempahla ngenyanga kaNhlolanja sehlile nxa kuqathaniswa lenyanga kaZibandlela, isuke ku 0,7% yayehla yafika kokunye lengxenye ekhulwini-1,6%.
Ngesikhathi esifanayo izisebenzi zikahulumende ezigoqela ababalisi baqhubeka bekhalala umsebenzi ngoba befuna ukuphiwa iholo labo ngedola leMelika ukuze libe ngamadola aphezu kwenkulungwane eyodwa (USD$1260).
Ngenyanga ephelileyo inhlanganiso yabongi eye Zimbabwe Nurses Council ikhuphule imbhadalo eziphathelane logatsha lwezempilakahle zibethwa ngedola leMelika. Abohlangothi lwezemihloliso olwe Zimbabwe School Examination Council lamakilinika ekhansili yakoBulawayo abiza imbhadalo yokwelatshwa ngedola leMelika.
