JOHANNESBURG - Izizalwane zeZimbabwe ezihlala kwele South Africa ezilamapermit eZimbabwe Exemption Permit azaphelelwa yisikhathi ngoNhlangula sezikhuthazwe ukuthi zingaqali ukuthatha amapermit esingundengunde asegcwele indawo yonke.
Umhlaka 30 Nhlangula lilanga eselilethe ukungahlaliseki kuzizalwane zeZimbabwe ezifika izinkulungwane ezilikhulu lamatshumi ayisitshiyagalombili - 180,000 esezihlale kweleSouth Africa okweminyaka edlula elitshumi.
Inengi labo sebezamile ukufaka izicelo zamanye amapermit kodwa kwehlula.
Umngcinisihlalo wenhlanganiso yeZimbabwe Community in South Africa, uMnu. Ngqabutho Mabhena, utshele iVOA ukuthi lesi simo sesenze ukuthi kube lenqwaba yabantu abalanda abeZimbabwe laba besithi bangabenzela amapermit okucacayo ukuthi inengi lawo ngawamanga.
“Abanengi babo sebedliwa izimali sebehlangana labotsotsi abathi balabantu ababaziyo eHome Affairs abasebenza labo babanike amapermit omgunyathi abanye bayabhadala amaR15,000 abanye ama20,000 abanye njalo ama30 000 kanti-ke laleyi permit angeke usho ukuthi yifake or not umehluko yikuthi amadetails ayo awekho kusystem.”
UMabhena uxwayisa abeZimbabwe laba ukuthi bangabanjwa belamapermit angekho emthethweni bazafela ejele.
“Ukhona omunye owabhadala R30,000 uthe ma esesuka ebhoda wasuka esebaleka sekunanzelelekile ukuthi iPermit yakhe ngeyomgunyathi.Mina engingakwenza yikuthi nxa umuntu engakwazi ukuaplaya engakwazi ukugcwalisa amafomu kucomputer kuinternet ngimncedise ukugcwalisa amaform kodwa lowo muntu kumele azihambele yena eVFS ahambise amaphepha athathe ifingerprint.”
UNkosazana Victress Mathuthu, umngcinisihlalo wenhlanganiso yeZim Imbokodo, elwela amalungelo abesifazana, uthi amaganyana agijima eselekana ehahabela abeZimbabwe laba ngenhloso yokubathengisela amapermit angekho emthethweni.
“Kodwa siyaxwayisa bakithi ukuthi ngaphambi kokuthi umuntu achithe imali zakhe azisebenze nzima athenge ipermit emuntwini.Umuntu aqale adingisise mpela ukuthi leyi ipermit ayithengayo yipermit ezomsebenzela yini njalo siyaxwayisa ukuthi akekulindwe ukuthi njoba abantu kuthwa abantu baaplaya amawever kuaplywe amawever sibone ukuthi ziyabuya yini impendulo njalo zibuya zithini ngaphambikokuthu sithathe izimali zethu sithenge amapermit lawa emikotweni.”
Isizalwane seZimbabwe laye osesebenzise ipermit le okweminyaka eyedlula elitshumi, uMnu. Greatman Mkhwebu, uthi inengi labantu kunzima ukuthi basuke kweleSouth Africa ngakho bazimisele ukwemukela loba yini ezabapha ilungelo lokungabuyeli ekhaya.
“Ye vele le yinto ebesivele siyikhangelele ukuthi ekugcineni izakwenzeka mpela ukubona abantu bakithi beqolwa izimali ngohlelo lwamapermit.abantu bakithi siyazi ukuthi vele badesperate bazama ngazo zonke indlela ukuthi njoba lomqamulajuqu kaJune sewufikile anything eqhamukayo bayabe becabanga ukuthi sizalungiselwa amapermit.Engicabanga ukuthi mhlawumbe uhulumende weSouth Africa engakucabangisisa kahle asilingisele amapermit.”
Kusenjalo, ugatsha lwendaba zasekhaya kweleSouth Africa sekukudala luxwayisa abafuna olunye uhlobo lwamapermit ukuthi bangasebenzisi omunye umuntu loba inkampani kodwa baziyele mathupha kunkampani yeVFS eyiyo eyaqokwa nguhulumende ukwenza lokhu. Amankampani alabantu abebencedisa ekutholweni kwamapermitila bavalwa ukusebenza ngemva kokubona ukuthi badala inkohlakalo.