Izakhamizi zeNingizimu yeMaNdebeleni sezidlela evalweni kulandela ukungani kuhle kwezulu lokutshisa kwelanga, osekutshiye izilimo emasimini zitshile.
Lokhu kuza ngesikhathi inengi kulesisabelo lidinga uncedo lokudla kulandela ukungani kuhle kwezulu nyakenye okudale ukuthi inengi ingavuni lutho. Abogatsha lukahulumende lwezokulima bathi isimo sibi kakhulu esiqintini seGwanda South lase Beitbridge.
UMnu. Mkhunjulelwa Ndlovu, osaphethe isikhundla somqondisi wezokulima esabelweni seMatabeleland South, uthi umumbu olinywe izulu lisewula, usutshile njalo sebethembele ukuthola isivuno kolinywe ekucineni.
Uthi ngaphandle komumbu ezinye izilimo ezigoqela inyawuthi, zikhula kakuhle. Ukuswelakala kwezulu kumaviki adlulileyo sekutshiye lenkomo zisengozini yokucuba ikakhulu eziqintini zeGwanda South, leBeitBridge.
UMnu. Thembinkosi Nyathi owe-Bethel, eGwanda South, uthi isimo sibi emasimini.
“Kunzima kakhulu: Yonale iviki, belithembisa ukuthi lizakuna, kodwa qha sesilizwela kwezinye indawo. Izilimo ezinjengo mumbu, sokumhlophe nke emasimini sekutshile. Simadolonzima. Asikwazi ukuthi abantwana sizobathini lonyaka lempuphu siqalile ukukhuphuka intengo yakhona.”
UNkosikazi Gladys Moyo, oyisakhamuzi se-Mawane, phansi kweNduna uNhlamba, uthi bazabulawa yindlala lonyaka
Amazwi la agcizelelwe nguMnu. Teboho Ndou oyisakhamuzi se-Lutumba e-BeitBridge, laye othi sebelahle ithemba lesivuno esihle.
UKhansila ka-Ward 12 e-Gungwe uMnu. Okelitse Lenyane uthi akulanto enhle emasimini.
"Isimo sibi sibili akulalutho; amabele atshile izulu kalibonakali; izulu liyadingeka. Kuviki ephelileyo besise Gwanda silabo-DA;: Besikhuluma ngendlala yonaleyi, ukuthi ukudla kumele kutholakale kodwa akulalutho. Akulakudla e-GMB; indlala inkulu kakhulu.”
Uthi ngaphandle kwezilimo, izifuyo ikakhulu inkomo zilakho ukucuba iloba nini.
"Kutshile akulalutho, egangeni komile; lenkomo isimo sibi kungadingakala ukuthi kube labantu abathengisa isikuba ngentengo ephansi ukuze abanelisayo beqalise ukudobhadobha kathesi ngoba enkomeni lakho kubi.”
Abogatsha lwezokulima bakhuthaza uzulu ukuthi ahlakule emasimini ukuze alondoloze izilimo zakhe.
Inhlanganiso yamazwe omhlaba enakekela uzulu ohlaselwe yindlala eye-World Food Programme ithi abantu abafika phose izigidi eziyisithupha 5,7 million badinga usizo lokudla kuleli.