Bulawayo....................
AbeZimbabwe bamukela ngemibono etshiyeneyo imibiko yokuzasebenzela kwenkampani yebulenjini elizweni, ekasomabhizimusi odumileyo, emhlabeni jikelele, uElon Mask, eyeSpaceX, kuhlelo lwayo olweStarlink Satellite.
Lokhu bathi kuzathuthukisa umsebenzi wokutholakala kobulembu lula oqhutshwa ngamankampani anjenge Econet, Liquid, Netone lamanye ngoba bona beza lebhizimusi elithembisa okungcono kulakhona lobanje kungakacaci ukuba liqalanini.
Ephendula imibuzo kwelinye lamankampani akhe ayithenga ngomnyaka odluleyo, eyeTwitter ukuba inkampani yakhe yeStarlink izazosungula amabhizimusi eAfrica, uMnu. Elon Mask owazalelwa eSouth Africa kodwa osehlala eMelika waphendula ethi uzimisele ukusebenza emhlabeni jikelele emazweni wonke azamuvumela ukuthi aze khona. EZimbabwe akukacaci ukuba iStarlink izaphiwa na isicece zokuzosebenza kuleli.
Umabhalani omkhulu kugatsha lokuhanjiswa kwemibiko, olweICT Postal and Courier Services, uDokotela Beallah Chirume uchaze ukuba iStarlink ayikabi leLicense yokusebenza eZimbabwe njalo ayikabalobeli ukucela imvumo yokuzosebenza elizweni. lStarlink ngakwelinye icele enkundleni zayo zebulenjini ithi ilakho ukuqala ukusebenza eZimbabwe lakwamanye amazwe awewekazi leAfrica lonyaka.
Ingcitshi kwezebulenjini zithi kubanzima emazweni anjengeZimbabwe ayake acimele uzulu ubulembu uma kulokunye engafuni kwaziwe ngamanye amazwe womhlaba okuyabe kusenzakala elizweni okunjengo dlakela lwezombusazwe ikakhulu olokutshengisela bekhonona ngabayabe bekhonona ngakho. IStarlink ilakho ukusebenza inqe ngaphi komhlaba ngenxa yemitshina yayo elohlonzi loba ingelamitshina elizweni.
Kunje iStarlink iyasebenza kweleIran ingelamvumo kuhulumende walelizwe lona elingelinye lamazwe athanda ukuvalela abantu ubulembu ukuze uchuku oluyabe lusenzakala elizweni.
UMnu Nqaba Matshazi uRegional Campaigns Coordinator eMlSA Zimbabwe inhlanganiso elwela amalungelo obulembu leNtathelizindaba eZimbabwe uthi kuzindaba ezinhle ukuza kweStarlink eZimbabwe kodwa udubo yikuba abakabi lesiqiniseko sokuthi baqala nini.
“Kuyathokozisa ukuba kweyinye inkampani etholisa ezebulenjini iStarlink kodwa okusidanisayo yikuthi akucaci ukuthi ngaliphi ilanga kodwa eZambia leMozambique sekulamalanga anga lwe phansi acacayo.”
UMatshazi uqhubekele phambili esithi inhlelo zeStarlink zizadulela inengi labantu ikakhulu emakhaya.
“Okuzaxaka abanengi emakhaya loba amagagasi ebulenjini ezafika yikuba iyadula ukuthenga ireciever yeStarlink yi$599 USD abazenelisa ukuthenga bambalwa. Usalinde ukuthi bazokufaka ebulenjini kumele uhlawule ikhulu lamadola emelika okuzakhama inengi.”
Okwamanje amankampani ebulenjini akhona abalisa iLiquid, Econet leNetone inengi livele alenelisi ukuwafinyelela kumbe ukuthenga amagagase okungena ebulenjini.
UNkosikazi Duduzile Ncube obona ngezebulenjini eGirls College koBulawayo uthi ukuza kweStarlink eZimbabwe kuzenza inengi lifinyelele ebulenjini ekakhulu emakhaya.
“Inengi emakhaya lizafinyelela ebulenjini kuphinde kulethe ukuncintisana kumankampani asebulenjini lokwelatshwa kwentengo yokuba sebulenjini ngoba okwamanje kuyadula.”
UMabhalane weBulawayo Progressive Residents Association uMnu Thembelani Dube uncome imizamo yeStarlink ethi izakwenza wonke umuntu abesebulenjini.
“Ukuza kweStarlink eZimbabwe kuzakwenza ukuba lathi sithuthuke ekusebenziseni ubulembu edolobheni lemaphandleni kuphinde kudalewumngcintiswano phakathi kwmankampani ebulenjini ngoba akhona ayadula futhi awasebenzi kuhle.”
Olwela amalungelo oluntu eseLupane uMnu Vumani Ndlovu uthi kuzabasiza kakhulu emakhaya lesikolo ngoba awakho amagagasi abambekayo.
“Uma iStarlink ingaphumelela ingasiza okumangalisayo emakhaya ilethe intuthuko kuzakhamizi labafundi esikukhalelayo yikuthi uhulumende engafaki imithetho ezavimba ukusungulwa kweSatrlink ngoba amankampani akhona ayehluleka ukusiza abantu bonke ezweni kumbe ukuza kweStarlink kuzakwenza baqale ukufinyelela indawo zonke ezweni.
Okwamanje eZimbabwe imuli eziyisilinganiso sokuthathu ekhulwini yizo ezenelisa ukuhlawulela indleko yokungena ebulenjini. Okwamanje abantu abanengi baveza ukukhathazeka ngesandla sikahulumende esomileyo kumithetho yebulenjini lakumankampani angaba lesifiso sokusungula amabhizimusi kuleli bethi kumele ayekethise imithetho.
Ngesikhathi sisiya emoyeni uMnu Gift Machengete wePostal and Telecommunications Regulatory Authority of Zimbabwe ubengakaphenduli imibuzo mayelana lokubhalela ukufuna ukusebenza kweStarlink kuleli.
Ezwekazi leAfrica amazwe asethe apha inkampani yeStarlink imvumo yokusebenza agoqela iMalawi, Nigeria leMozambique. Okwamanje amazwe angamatshumi amane lanhlanu ayasebenzisa ubulembu beinternet beStarlink emhlabeni jikelele. Amazwe abalisa iAmerica, Canada, Australia, New Zealand, Denmark, France leUnited Kingdom ngamanye amazwe asebenzisa ubulembu beinternet beStarlink.
