Sekungumnyaka selokhe ibandla le Citizens Coaltion for Change (CCC) labunjwayo, ibandla lingela sisekelo sombuso lemigoqo yokuba libusa njani. Ibandla leli lithi kalisoze lilandele indlela zakudala zokudinga usekelo lisithi uzulu uyakwazi akufunayo.
Ibandla le CCC labunjwa ngomnyaka odluleyo ngemva kokungazwisisani lokufuthelana okwaqhamuka phakathi kwenkokheli yamacele aweMDC ehlukeneyo elinye icele selibizwa ngokuthi MDC-T elinye lizibiza MDC Alliance.
Lobanje ibandla leli lenelisa ukuthola izikhundla ezinengi kukhetho lwamaBy-elections olwacina lusenziwa ukuthatha izikhundla zalabo ababexotshisiwe nguMwonzora lanamhlanje kalikabi lesisisekelo sombuso, loba inkokheli ekhethwe ngabantu.
Ingcitshi ezicubungula ezombusazwe zithi lokhu kulakho ukuphazamisa ibandla leli ngoba kuveza ukuba kalilungelanga ukungena kukhetho lwalonyaka.
Eyinye yalezi ngcitshi nguMnu Peaceful Sibindi othi kumele ibandla leli liqale lilungisise loludaba.
“Ibandla leli kumele linanzelele ukuba ukuya kukhetho lingela constititution, amastructures lomhlangano wokukhetha inkokheli kulakho ukuphazamisa ukuvotelwa kwalo”
Lokhu kusekelwe ngeyinye njalo ingcitshi yezombusazwe uMnu Matthew Dube yena othi lokhu kulakho ukuliphambanisa ekukhankaseleni usekelo.
“Kumele ibandla leli licace ukuba lifuna ukwenzani. Nxa lingalungelanga ukhetho kambe lingabe injongo yalo kungeyani”
Kodwa isikhululumeli sebandla leli uMnu Gift Ostallos Siziba uthi ibandla lakhe kalilani lokungabi khona kwe sisekelo esithi lokhu bazakulungisa.
“Njengebandla le CCC sizalungisa lokho abantu abakhala ngakho. Ibandla lethu lilungele ukuya kukhetho kungelani lalokho abasisolayo abakutshoyo”
Okusekelwa ngeyinye ingcitshi kwezombusazwe uMnu Bekezela Gumbo osebenza lenhlanganiso eyeZimbabwe Democracy Institute (ZDI) othi ibandla leli lilakho ukwenza izimanga kukhetho lwalonyaka.
“Sebetshintsha ama card besenzela iZANU PF. Sebesebenzisa indlela yokuba abakhuluma abakufunayo isitha silalale. Bafuna iZANU PF ingabi ithumela abantu bayo ukuya thatha izikhundla”
Amalunga aweCCC athi kunzima ukukhankasa ngoba bebotshwa njalo besethuselwa lona ukhetho soludumela emansumpeni.
Omunye okunkokheli ye CCC uNkosikazi Ellen Shiriyedenga uthi ibandla lakhe lisebunzimeni ngenxa yokubotshwa lokuhlukuluzwa okutshengisa ukuba ibandla leli lizimisele.
“Bahlukuluza abantu ukuba yindaba besekela iCCC esekelwa ngu baba uChamisa. Ngenye into okumele siyikhangele lapho sisiya ku khetho luka 2023”
Ukuze kubunjwe iCCC, icele leMDC-T elikhokhelwa ngu Mnu Douglas Mwonzora laya emthethwandaba livimba icele eleMDC Alliance elalikhokhelwa nguMnu. Nelson Chamisa ukusebenzisa ibizo lokuthi MDC. UChamisa esebona ukuba ibizo lokuthi MDC laselimtshayisa ikhanda weza leqhinga lokubumba ibandla elitsha walibiza ngokuthi Citizens Coaltion for Change (CCC).
Lokhu ukungazwisisani kwenza ukuba amanye amalunga edale lephalamende aweMDC Alliance axotshiswe kulelo dale nguMwonzora ewethesa icala lokulandela uChamisa.
Ibandla leli lahle langena kukhetho luka Mbimbitho ngomnyaka ophelileyo lapho elenelisa ukuthola izikhundla ephalamende ezifika itshumi lasitshiyagalolunye-19 endaweni ezifika amatshumi amabili lasitshiyagalombili- 28 lapho elancintisa khona.
