Harare........................
Udubo lokuzimuka okwedlulisa amalawulo okucina kuphazamisa impilakahle yomuntu, acine esebanjwa ngeminye imikhuhlane edalwa yilesi simo, lubikwa solubhahile e Zimbabwe.
Lokhu kwenzakala ngesikhathi lezi ngcwethi zisithi kulokusilela kolwazi kwabanye abayabe belalesi simo babanjwe ngamandla ukuyadinga uncedo ngendleko enkulu ikantike bengenelisa ukuzivikela.
Abezempilakahle bathi isimo seObesity sibangelwa yikudla okucina kusanda emzimbeni umzimba ungenelisi ukukugaya kuhle kube sokubangela ukuzimuka owedlulisa amalawulo okuyikho okudala imikhuhlane ethize efana lowetshukela oweDiabetes.
Ingcitshi kwezempilakahle engu Nutritional Therapist uNkosazana Laura Mussell uthi ukudla esikudlayo nsuku zonke yikho okuqakathekileyo ukukunanzelela ukuvikela lesi simo.
“Kulokunye ukudla okugayeka kuhle emzimbeni kube kusimo esihle esiswini kube lokunye ukudla okususa incekeza kusibindi somuntu kubekhona njalo okwehlisa amafutha lalokho okwenza ukuba umuntu ahlaliseke nje engqondweni”.
Uthi loba umuntu angaba kusimo esihle kanganani kukho konke ezilolonga umzimba kakuhle kodwa nxa engananzeleli akudlayo I obesity I ba ludubo olukhulu.
Incitshi zithi ukudla ababona kuqakathekile yikudla kwendulo okutholakala kalula kodwa osokukhanya abantu sebekukhangelela phansi ikakhulu emadolobheni.
Osakhulayo u Crispen Mpofu uthi njengabasakhulayo ukudla lokhu abalalwazi ngakho njalo babona kungatholakali.
“Sifisa ukuthi ngasiyakuthola lathi singakwamukela njengabantu kodwa ithuba lakhona yilo elililutshwana ukulithola ngoba okunengi kokudla lokhu emadolobheni luludubo kodwa siyakufisela sibili.”
Omunye njalo osakhulayo, uRalph Majome uthi abatsha sebethakazalela ukudla kwakulezinsuku ikakhulu emadolobheni kanti kubalungele ukuba bedle ukudla okwakha umzimba kusehlisa udubo kumpilakahle yabo.
“Ukudla lokhu hayi asikutholi kalula yilo udubo esilalo sesijwayele khona okwesilungu ngoba lokhu akutholakali kalula kulezinsuku kodwa kulungele wonke umuntu.”
Ikhansili ebona ngokudla okwakha umzimba eye Food and Nutrition Council ithi ikhangelane laloludaba lokuthuthukisa ulwazi olungalwisana lendubo ezifana lokusilela kokudla kunye lokuzimuka besabalalisa ulwazi njengokutsho kukamnumzana Tinomutenda Makaudze wali ikhansili.
“Sithuthukisa lolulwazi ngenjongo yokuthi sibe leqiniso lokuthi abantu babokwazi ngokudla konke okulungileyo okumele bekudle okulungele impilakahle yabo.”
Incitshi ezibona ngokudla okwakha umzimba okungasiyo ngozi, ama dietician zithi uzulu kumele enanzelele ukuba abalolwazi bakhona abanganceda kulokukhangela ebulenjini ubusuzisiza ngoba kanengi nengi uzabuyela eukuzimukeni okwedlulisa amalawulo njalo.
Bathi ukuze umuntu alwisane laloludubo kuyadingakala ukuba ehlale ezilolonga umzimba, amaexercise anjengokuhamba hamba nje emangweni ohlala kuwo, usidla ukudla okwakha umzimba okungela mafutha kakhulu, okufana lemibhida, isinkwa se whole wheat, inyama engela mafutha kangako,ukudla inhlanzi lokwehlisa ukudla okuletshukela elinengi lokungadli okulamafutha kakhulu okubizwa ngokuthi yi junk food esisanda emadolobheni.
Isitshwala samabele sibikwa singcono kulesimhlophe le rice eyamakhaya kulaleyana emhlophe nxa ufuna ukwesihla ukuzimuka njalo bethi ukuthola isikhathi sokulala kuhle lokwehlisa ukukhathala engqondweni kungaphathisa kuloludubo kodwa okuqakathekileyo kakhulu yikudinga ulwazi kwabafundela lumsebenzi ukuze bekuphathise.
Uzulu olwisana lesimo se obesity ukhuthazwa ukuba lomkhuba wokudla okuncane ngasikhathi sinye esengezelela izikhathi kulokudla ukudla kukunengi eselambe kakhulu sikhathi sinye. Omama abazithweleyo labo balakho ukuba laloludubo kubangelwa ngomumo wama hormones alakho ukuguquka kuleso sikhathi.
Ngaphandle kokuzimuka izibonakaliso zalesisimo zigoqela ukukhefuzela, ukuginqa, ukudinwa mahlayana, ukuhoqa kakhulu uma umuntu elele lenhlungu zeqolo phakathi kokunye.
