Ibandla leCitizens Coalition for Change lithi kuqhamuke udlakela eMurhewa ngoMgqibelo njalo lethesa eleZANU PF umlandu ngalobu ubudlwangu-dlwangu.
Isikhulumeli salelibandla uNkosazana Fadzai Mahere ulobe enkundleni yakhe yebulenjini eyeTwitter ukuthi ibandla leZANU PF selisesabela ukunqotshwa ngelakhe kukhetho olukhangelelwe ukuqhutshwa kuwonalo umnyaka njengoba iCCC isithola usekelo olunengi emaphandleni.
Asenelisanga ukukhuluma lebandla leZANU PF ngaloludaba, kodwa lihlezi lilandula ukuthi libangela udlakela.
Amapholisa ethule umbiko ebulenjini beTwitter esithi ayabon aumfanekiso we video otshengisa loludlakela njalo azadingisisa ngaloludaba.
Kusenjalo, inengi lithi umnyaka ka 2022 ube lokuqhubeka kokuhlukuluzwa kwalabo abalwela amalungelo oluntu kanye labakumabandla aphikisayo.
Endaweni zemaphandleni ezifana le Matobo, eMasvingo, Umguza, Bulilima, eGokwe, e Kwekwe lezinye izehlakalo zodlakela zibikwa zilokhe zikhuphuka osokubangele ukuthi kube lokwesabela okungenzakala kukhetho lika2023.
