JOHANNESBURG - Kwele South Africa ngoLwesihlanu kuqhutshwe umthandazo wendunduzo yabantu abangamatshumi amabili lesithupha (26) abagoqela abadabuka eZimbabwe abane abafele engozini yokudubuka kwemota yepetulo ebanjelwe ngaphansi kwebholoho leBoksburg elisempumalanga yeJohannesburg.
Bekungumthandazo wosizi lenyembezi ngesikhathi izihlobo, abangane, iziphathamandla zikahulumende labezenkolo bethe gwaqa eBoksburg City Hall emthandazweni wokukhumbula asebedlule emhlabeni laba.
Lingozi yenzeke mhlaka 24 Mpalakazi ekuseni ngesikhathi imota yepetulo ibanjelwa ngaphansi kwebholoho ebidlula kulo. Ngemva kokubanjelwa kwayo kuthe kungakapheli ihola yadubuka kwaqubuka inkalakatha yelangabi lentuthu okuhugule wonke umuntu obeseduzane. Kwabafileyo laba kugoqela abebezidlulela, abebebukele labanye abebezenzela into zabo duzane lalelibholoho. Kufe njalo lezinye izisebenzi zeOR Tambo Memorial Hospital eseduze laleli bholoho.
Isiphathamandla sehofisi yomeli weZimbabwe kwele South Africa, uConsul General Memory Chaurura, utshele iStudio 7 ukuthi kulabe Zimbabwe abane ababhubhe kule ingozi.
Abane laba nguThomas Vushendibaba oleminyaka engamatshumi amahlanu lanhlanu (55), lomnawakhe uNathaniel Vushendibaba oleminyaka elitshumi lasitshiyagalolunye (19), loLuckson Marufu oleminyaka engamatshumi amane (40) kanye loKudakwashe Chanakira.
“Silusizi kakhulu kumuli ezilahlekelweyo kanye lakuhulumende weSouth Africa ngalesi siga. Sizakwenza konke esikwenelisayo ukusizana lemuli zeZimbabwe ukuze zenelise ukungcwaba izihlobo zazo ngesizotha.”
Umfowabo ka Kudakwashe, uMnu. Wilson Chanakira, uthi umnawakhe uthole ucingo luvela komunye wabatshayeli bemota zakhe esithi amlethele imali.
Lokho-ke kuhle kwaba yikuhamba kwakhe, okuthe ngemva kokutsha wathalelwa esibhedlela lapho abhubhele khona.
“Sihlulukelwe ngalesisiga. Asilamathe. Utshe lephasipoti yakhe, amakhadi ebhanga lakho konke abekuthwele akulanto eseleyo.
Umphathintambo wogatsha lwezempilakahle, uMnu. Joe Phaahla, nguye owethule amazwi enduduzo avela kuhulumende weSouth Africa.
“Ayikho anye into ezwisa ubuhlungu okwedlula leyi. Yibuhlungi obuzahlala ezinhliziyweni zethu kuze kube sekufeni.
Kusenjalo, abako Vushendibaba bathi izihlobo zabo zizangcwatshelwa kwele South Africa, kuthi uMarufu uzangcwatshelwa eBuhera besekusithi uChanakira eyengcwatshwa eHarare