Amapholisa akoBulawayo lamhlanje abophe abantu abathathu uNkosazana Samu Tshuma umqondisi weGirls Table, umsekeli kamqondisi welbhetshu LikaZulu uMnu Tamsanqa Ncube lelunga lenhlanganiso le, uMnu Melusi Nyathi, ngesikhathi belungiselela ukunanza ilanga eleUnity Day. Amapholisa aphinde ahlukuluza intathelizindaba zisenqabelwa ukuthatha izithombe lemifanekiso yamavideo.
Namhlanje iZimbabwe inanza ilanga eleUnity Day kodwa uzulu wasemhlubulweni weMandebeleni ekhala ngokubandlululwa nguhulumende ngendlela ezinengi okucina kungakhombisi ukuthi kulokubambana ezweni.
Umqondisi weIbhetshu LikaZulu, uMnu Mbuso Fuzwayo uthi ukuvinjwa ukunanza ilanga leli lokubambana kuphikisana lenkulumo yokumanyana ekahulumende.
“Kuyasimangalisa ukuthi uhulumende ngelinye icele uthi uyavuma ukukhumisana umlotha ngombhuqazwe weGukurahundi kodwa ngelinye icele ubopha labo abafuna ukukhumbula izihlobo zabo ezafa ngalesosikhathi okunxele kubotshwa labantu okutsho ukuthi akulakubambana.”
UMqondisi weGirls Table uNkosazana Samu Tshuma ekhuluma engakabotshwa uvumelane loFuzwayo.
“EZimbabwe akula kubambana ngoba uhulumende uqhubeka ehlukuluza ebopha labananza usuku lweUnity Day okungahambelani lokukhulunywa ngumongameli njalo lokhu kukhombisa ukuthi akula kubambana kuleli.”
UMongameli weZimbabwe National Students Union-iZinasu- uMnu Benon Ncube uthi inkulumo yonke kaMongameli Emerson Mnangagwa yalonyaka kuhlanganisa lokubotshwa kwabantu akubonisi kubambana ezweni.
“Umongameli uhlala ekhuluma ngokubambana ezweni kodwa akunjalo namgo usebenzisa amapholisa ukuvimba ilanga leUnity Day okusobala ukuthi sisasekude lokubambana ezweni.”
Osakhulayo webandla leMthwakazi Republic Party- MRP uMnu Lwazi Khanye uthi kuyadanisa ukubotshwa kwabantu ngelanga leUnity Day.
"Abantu balelungelo lokunanza ilanga leUnity Day kodwa kuyadanisa ukuthi abayibo okumele bananze lelilanga bakhululekile njalo belelungelo kusisekelo sombuso bayabotshwa okuveza obala ukuba akulakubambana ezweni.”
UMongameli Emerson Mnangagwa kunkulumo yakhe enanza ilanga leUnity Day uchaze ukuba kulusuku oluqakathekileyo ngoba lwavela ngemva kweminyaka engamatshumi amathathu lanhlanu adlule kudingwa ukuthula lokubambana ezweni njalo uhulumende wakhe wenza konke okusemandleni akhe ukuthi kubelokuthula lentuthuko ezweni jikelele.
Ngomnyaka ka1987 abebandla leZAPU leleZANU bahlala phansi balobelana isivumelwano sokukhumisana umlotha, okwadala ilanga lwUnity Day emizameni yokuletha ukuthula elizweni, kulandela ukubulawa kwabantu abanengi okwamagama ngesikhathi sombhuqazwe weGukurahundi.
UZulu uthi akula kubambana lokhe kwaba lesivumelwano lesi nanko abantu lokhe bebotshwa kuthi lokufuthelana okwadalwa ngumbhuqazwe weGukurahundi lokhe kungakalungiswanga.
Inengi labathinteka langokulahlekelwa yizihlobo labemuli likhala ngokuthi amanxeba enhliziyo lokhu ebhibhidla njengoba abakhokhela kulesi siga lokhu bengaxolisanga. Uzulu owathinteka ngalumbuqhazwe ezabelweni zeMandebeleni laseNkabazwe, lokhe ekhala ngobandlululo kukho konke empilweni ikakhulu kwezentuthuko loba ukutholiswa uncedo.