WASHINGTON DC - Inhlanganiso emela ababalisi bemaphandleni eyeAmalgamated Rural Teachers Union of Zimbabwe (ARTUZ), ithi yamukele ngenjabulo inyathelo leBhilithani lokunxusa ababalisi beZimbabwe abafuna umsebenzi wokuyafundisa kulelolizwe.
EleBhilithani lazise ukuthi kusukela mhlaka 1 ngoNhlolanja, 2023, iZimbabwe izakuba ngelinye lamazwe asezwekazi leAfrica amane alababalisi abazavunyelwa ukudinga umsebenzi kulelolizwe phansi kohlelo lweQualified Teacher Status.
Amanye amazwe eAfrica asefakwe kuloluhlelo okwakuqala abalisa eleGhana, South Africa, leNigeria. Amanye asevunyelwa ndawonye laweAfrica la ngathi iUkraine, Singapore, Jamaica, Hong Hong, leIndia.
Phambilini kwalokhu, iBhilithani ibivumela kuphela ababalisi abavela eMelika, Canada, New Zealand, Scotland, Nothern Ireland, Switzerland, Gibralta, Australia lamanye akumanyano weEuropean Union.
Isikhulumeli seARTUZ uMnu Thembakuye Moyo uthi lokhu kuyabathokozisa ngoba kuzakupha ithuba abanye ababalisi beZimbabwe ukuthi bathole iholo elithe xaxa bengathola umsebenzi eBhilithani.
