WASHINGTON DC - Umhlangano obuhlaziya udaba lweGukurahundi osungulwe kuthange wagqitshwa izolo uthethe izinqumo ezigoqela esokuthi kumele kuhlelwe ilanga lokukhumbula abantu ababulawa yilumbhuqazwe minyaka yonke, i-memorial day, njalo kube le-museum echaya imininingwane ngalesi siga.
Umhlangano lo unqume njalo ukuthi uhulumende kumele acace ukuthi waphatheka njani ekubulaweni kwabantu abedlula inkulungwane ezingamatshumi amabili, 20,000 ezigabeni zeMatabeleland zombili kanye laseMidlands.
Lumbuthano ubuqoqwe yinhlanganiso yeZimbabwe Christian Alliance imanyene leyePublic Policy and Research Institute of Zimbabwe.
Omunye wabaphatheke kulumhlangano uMnu Mbuso Fuzwayo, ongumqondisi wenhlanganiso elwela amalungelo oluntu eyeIbhetshu LikaZulu utshele iStudio 7 ukuthi kuqakathekile ukuthi iqiniso liphume lonke mayelana ngeGukurahundi ukuze kuqedwe ukufuthelana olulokhe kukhona elizweni phezu kwaloludaba.
