Inhlanganiso elwela amalungelo amakholwa iZimbabwe Christian Alliance imanyene ngoMvulo labePublic Policy and Research lnstitute of Zimbabwe baqoqe umbuthano wengxoxo ephathelane lodaba lokukhuthaza ukuthula kanye lemizamo yokulungusa umbhuqazwe weGukurahundi.
Lumhlangano owenzelwa koBulawayo uwhatshwa phansi kwesihloko esithi “Honouring the dead, healing the living and the reconciliation for the future”.
Inengi labakade besemhlanganweni lo bathi bakhathazekile ngempawu zombhuqazwe weGukurahundi ngesikhathi ilizwe lilungiselela ukuya kukhetho kumnyaka ozayo.
Umgcinisihlalo weZimbabwe National Peace and Reconciliation Commission, uRetired Justice Sello Nare, ongene lumhlangano, ukhuthaze uzulu ukuba alondoloze ukuthula kukhetho oluzayo.
“Sikhangelele ukuba kubelokuthula ngesikhathi sisiya kukhetho lalapho selwedlule ngoba lomongameli uyakhuthaza uzulu ukuba kubelokuthula ezweni.”
Induna uKhulumani Mathema uchaze ukuba akula kusebenzelana phakathi kwenkokheli zomdabu lekhomishini yeZNPRC.
“Ekuqaleni sasisebenza kuhle leZimbabwe National Peace and reconciliation Commission kodwa manje akusela kusenenza kuhle njalo lokhu akusiphathi.”
UMfundisi uSikhalo Cele uthi ukuthula kuqakathekile ezweni kodwa impawu zombhuqazwe weGukurahundi ziyabonakala kwezokhetho ezweni.
“Impawu zeGukurahundi ziyavela sikhathi sonke kulokhetho indlela abantu abavota ngayo labadlula kukho lendlela abahlukumezwa ngayo.”
EZimbabwe ukuhlukumezana phakathi kobulili kuvamile njalo uma kungela ovumayo ngokuphaheka kudlakela ngesikhathi sombhuqazwe kubanzima ukuba lokukhumisana umlotha lokuthula, kutsho uNkosikazi Sinqo Nyathi ongene umhlangano walamhlanje.
“Udlakeka luzaqhubeka luhamba phambili ukulunga kwezinto kuzathatha isikhathi ngoba kungela ovumayo ukuba ulesandla kumbhuqazwe weGukurahundi njalo atsho kumphakathi okwamanje konke kuyize.”
Okwamanje uzulu udideke ingqondo ngokuphiwa amandla kunkokheli zomdabu ukuba ziphathe udaba lokukhumisana umlotha ngombhuqazwe weGukurahindi bethi ukuthula ngesikhathi sokhetho oluzayo kunciphile ngoba ikhomishini ebona ngezokuthula ezweni seyemukwa amandla nguhulumende kukanti usahluko 12 wesisekelo sombuso uthi ikhomishini ilamamdla.