Iqembu leEcuador linqobe eleQatar 2-0 emdlalweni wokuqala kumncintiswano weWorld Cup 2022 enkundleni yeAl Bayt Stadium.
Imidlalo le ngoyokudinga intshantshu yezizwe zomhlaba wonke jikelele.
Ugadli weEcuador, uEnner Valencia, ulithele emambuleni kabili. Ukewenza okufanayo umdlalo usanda kuqala kodwa unompembe wathi uhambe masinyane abavimbi bakwele Qatar sebesukile bonke.
Amaqembu womabili lawa maqembu akusibaya sikaGroup A ndawonye leSenegal kanye leNetherlands. Intathelizindaba yezemidlalo uNgqwele Dube uthi eleQatar lizalingisa eleSouth Africa ekubeni lilizwe eliqoqe umncintiswano wezizwe zomhlaba elehluleke ukuphuma kumidlalo yezibaya.
“Hayi iQatar angiyiboni isiyaphambili ngoba vele enguqwini lapha kasibazi. EleSouth Africa kwakukhona okulithemba ngoba kwaba yilo iqembu elaqala ukuhlohla laphinda lenelisa lokunqoba kodwa eleQatar lona vele entweni zebhola kalikho.
Lokuphiwa ilungelo lokuqoqa imidlalo kungenxa yokuthi khathesi bazama ukuba umncintiswano lowu ufike kowo wonke amagumbi omhlaba njengoba laseSouth Africa kwathiwa kuphiwa ithuba izwekazi laseAfrica. Angiliboni lisedlula kusigaba semidlalo yezibaya iqembu leQatar.”
Owayengunozinti njalo owadlalela amaqembu abalisa eleEagles, Hwange kanye leHighlanders, uJohannes Tshuma, uthi isimo somkhathi singaphathisa iqembu leQatar ngoba kutshisa kakhulu kulelolizwe.
“Angiyazi imbali yelizwe leQatar emdlalweni wenguqu kodwa njengelizwe okuyilo eliqoqe limidlalo selingenza izimanga. Ngizakupha umzekeliso wami ngisadlala eHwange. Amanye amaqembu abethwala nzima ngokutshisa kwelanga njalo lokho kwakusisebenzela.
“Sokungabasebenzela labo abeQatar ukuba elizweni labo kuyatshisa njalo amanye amazwe awatholanga isikhathi esiyaneleyo ukuba bejwayele isimo somkhathi.”
Imibiko ephuma khonale kwele Qatar ithi kwenziwe imizamo eyokuba ezinkundleni kungatshisi kakhulu. Omunye umdlalo wesibaya sikaGroup A uzadlalwa ngoMvulo njalo uzakuba phakathi kweqembu leSenegal leleNetherlands.
USindiso Nxumalo uthi uwulinde ngamehlo abomvu umdlalo lowu.
“Umdlalo mina engiwukhangeleleyo ngophakathi kweSenegal leNetherlands kusasa ngoba ngomabili lawamaqembu ngibona angani yiwo angadlulela kusigaba esilandelayo esomncintiswano.
“Angikholwa ukuba iQatar le Ecuador zingadlulela phambili ngoba abalabo abadlali abezinga laphezulu nxa siqathanisa lamaqembu eSenegal kanye leleNetherlands.
Asazi kumbe iSenegal isingaphazamiswa yikungabi khona kukaMane kodwa amathuba awokudlulela kusigaba esilandelayo akhona. Sebengadliwa lasemdlalweni wabo wakuqala kodwa amathuba awokudlulela kusigaba esilandelayo akhona.”
Amaqembu akusibaya sikaGroup B abalisa eleEngland, Iran, United States of America kanye leWales lawo azadlala ngoMvulo. UThembelani Sibanda uthi sekungaba lempumela engethusa abalandeli bomdlalo wenguqu.
“Emidlalweni yakusasa iqembu leIran selinganqoba eleEngland ngoba bona isimo somkhathi esiseQatar basijwayele. Amaqembu amancane lawa angajwayelekanga asengenza izimanga uthole ukuthi ezingaphumelela ziphuma kusibaya sikaGroup B yiIran leUSA. Isizatho kuyikuba iqembu leUSA lilabadlali abasakhulayo abangajwayelekanga kodwa abagijima kakhulu ngoba amathambo esavuma.”
Kulamaqembu angamatshumi amathathu lambili – 32 aphatheka kumncintiswano wezizwe zomhlaba njalo afakwe kuzibaya eziyithoba minwe mbili. Ngemva kwemidlalo yezibaya amaqembu amabili ayabe ehlezi phezu kwengalane yemiklomelo yiwo azadlulela kusigaba esilandelayo esomncintiswano.
Izwekazi leAfrica limelwe ngamazwe abalisa eleSenegal, eleGhana, eleCameroon, eleMorocco kanye leleTunisia.