WASHINGTON DC - Kubotshwe abantwana besikolo abangamatshumi phose amane, 39, koBulawayo abatholakale besemcimbini obizwa ngokuthi yiVuzu party kwenye indlu eKhumalo lapho obekunathwa khona kusenziwa yonke imithanithani yokuganga.
Isikhulumeli samapholisa uMnu Paul Nyathi wazise ngoMgqibelo ukuthi abasolwa laba babotshwe ngoLwesihlanu njalo bafunda ezikolo ezitshiyeneyo koBulawayo.
Kodwa katshongo ukuthi bazamiswa nini emthethwandaba lokuthi yiwaphi amacala kahle-kahle abazawetheswa.
UNyathi uthe emcimbini lo bekulotshwala bomkhakha weWhiskey, igwayi kanye lama-condom asebenzileyo langasebenzanga, okuveza sobala ukuthi bekusenziwa ezocansi.
Imicimbi enje isiyinsakavukela umchilo wezidwaba eZimbabwe lapho abasakhulayo abahlangana khona besebenzisa okudakayo okugoqela utshwala lezidakamizwa ezitshiyeneyo eziyingozi njalo besiya emacansini.
Abanye bacina sebebamba imikhuhlane engelaphekiyo efana lowengculazi.
