JOHANNESBURG - KulabeZimbabwe abedlula itshumi ababotshelwe ukuba seSouth Africa ngokungekho emthethweni ngoLwesihlanu ngesikhathi besiya emhlanganweni wokuhlomisa izizalwane zeZimbabwe ezizabuyiselwa ekhaya ngomnyaka ozayo ngemva kokwesulwa kwama-permits azo.
Umhlangano lo uqhutshelwe eJohannesburg yinhlanganiso ebona ngokuthuthukiswa kwamabhizimusi ezizalwane zezwekazi laseAfrica, eyeAfrican Development Consortium.
Injongo ibingeyokucebisa abeZimbabwe abazabuyela ekhaya ekupheleni kohlelo lweZimbabwe Special Permits, ukuthi bengafika basungule waphi amabhizimusi ekhaya njalo njani ukuze bathole indlela zokuziphilisa.
Izikhulumi ebezisemhlanganweni lo zithe kuqakathekile ukuthi labo abazaphelelwa yimisebenzi eSouth Africa bathole ulwazi oluzabaphathisa njengoba kungelamisebenzi eZimbabwe.
Elinye lamacebo akhandwe kulumhlangano yikuthi abazabuyela ekhaya laba babhalise amagama abo kanye lamabhizimusi abafuna ukuyaziphilisa ngawo afana lokulima, ezokwenjiwa, ezokupheka, ezokulungisa izimota lokunye okutshiyeneyo.
Ngemva kohlelo lokubhalisa kuzasungulwa uhlelo lokubapha amakhono okusungula lokuthuthukisa amabhizimusi abayabe bewakhethile.
Kulumhlangano kuhle kwasungulwa inhlanganiso yezamabhizimusi egoqela izizalwane zakweleSouth Africa lezaseZimbabwe, eyeZim-SA Business Facilitation Forum.
Okhokhela linhlanganiso usikhwicamfundo Danisa Baloyi laye okhulume kulo umhlangano. Uthe intuthuko ngeke ibekhona nxa kusekhona ukubandlululana.
“Isikhathi eside besisebenza kungama-South Africans, sisebenza kungama-Zimbabweans. The idea is to combine the two and put an effort ukuthi sisebenze sonke. And to me it’s something overdue,” kutsho uBaloyi.
Usomabhizimusi weZimbabwe njalo eyisikhulumeli sebandla leZanu PF kweleSouth Africa uMnu Kennedy Mandaza uthi inhlanganiso ebunjiweyo le izasiza labo abafuna ukubuyela ekhaya ukuzwisisa amathuba amabhizimusi akhona eZimbabwe kunhlangothi zomnotho ezitshiyeneyo.
Isiphathamandla seAfrican Development Consortium, uMnu Butholezwe Nyathi, uthe bona njengenhlanganiso ebize lumhlangano, indima yabo sebeyidlalile.
Ngakho, uthi ingqobe isikuzizalwane zeZimbabwe ezizabuyela ekhaya ukuthi zisukume, zibhalise ukuze zilolelwe ikusasa lazo eZimbabwe.
Uthe: “Sekusalele izizalwane zeZimbabwe eziya ekhaya ukuthi zisukume, zibhalise ukuze zilolelwe ikusasa yazo eZimbabwe.”
Isiphathamandla sogatsha lwendaba zasekhaya kweleSouth Africa uMnu Yusuf Simons, obekhona laye kulumhlangano wenqabile ukuphendula imibuzo yabeZimbabwe esithi udaba lokubuyela kwabo ekhaya lusenkantolo, ngakho kunzima ukuphawula.
Le yinto engajabulisanga umngcinisihlalo wenhlanganiso yeZimbabwe Community in South Africa uMnu Ngqabutho Mabhena.
“Akusiphathanga kuhle lokho ngoba besicabanga ukuthi sisuka lapha siyabe sesikwazi ukwazisa abantu ukuthi ma u-aplayela i-waiver wenzakanje kodwake asizange sithole impendulo embuzweni yenaleyo. Khathesinje izizalwane zeZimbabwe zilokhu zingakwazi ukuthi zenzenjani,” uMabhena utshele iStudio 7.
Iziphathamandla zehofisi yomeli weZimbabwe lazo bezikhona kulumhlangano.
