WASHINGTON DC - Abake baba ngoMongameli beMelika uMnu Barack Obama loMnu Donald Trump bazakhankasela amalunga amabandla abo ePennsylvania ngoMgqibelo phambilini kokhetho lokudinga amalunga ephalamende ngoLwesibili.
UObama uzaqhuba umhlangano ndawonye loMongameli Joe Biden bekhankasela ilunga lebandla labo elamaDemocrats uMnu John Fetterman ofuna ukuba nguSenator wePennsylvania.
Ngakolunye uhlangothi, uMnu Trump uzakwenza umhlangano wokukhankasela uMnu Mehmet Oz, olilunga leRepublican party.
Ukhetho lolu, olwaziwa ngokuthi ngama-midterm elections, ngolokudinga njalo osibalukhulu bezabelo lezinye iziphathamandla zezabelo ezitshiyeneyo.
Okwamanje ibandla elibusayo elamaDemocrats yilo elilawula amadale womabili. Kodwa uphenyo lukhomba ukuthi lelibandla lilakho ukunqotshwa ngelamaRepublicans.
Lanxa kunjalo abanye bathi akwaziwa okuzawela khona induku loxakuxaku ngoba uphenyo soluke lwaveza impumela engaqondanga phambilini kokhetho.
Ngaphandle kwesigaba sePensylvania, esinye isigaba lapho amabandla womabili akhankasa khona kabanzi kuseGeorgia lapho uSenator webandla lamaDemocrats uMnu Raphael Warnock azangqikilana khona loMnu Herschel owebandla lamaRepublicans.
