Amabandla aphikisayo athwele nzima eZimbabwe ngesikhathi ilizwe lilungiselela ukhetho oluzakwenziwa ngomnyaka ozayo.
Kawavunyelwa ukukhankasela ukhetho oluzayo ekhululekile njalo alamalunga avalelwe entilongweni esetheswa amacala okutshotshozela udlakela lokunye.
Abanye abavalelwe entilongweni ngabakubandla leMthwakazi Republic Party, eleCitizens Coalition for Change leZimbabwe Transformative Party.
Kusenjalo, akukaguqulwa indlela ukhetho oluqhutshwa ngayo njengalokhu okufiswa ngabakumabandla aphikisayo. Kuyini okumele kwenziwa ngamabandla aphikisayo ukwenzela ukuba angene kukhetho olulempumela ezathakazelelwa nguzulu?
UMnu. Effie Dlela Ncube, ingcwethi kwezombusazwe ezimeleyo, uthi kuqakathekile ukuba amabandla aphikisayo adonse kanye kanye ukuze kususwe ibandla elibusayo embusweni.
Kodwa uMnu. Nhlanhla Moses Ncube, okunhlanganiso yeFreedom Alliance, uthi okuhluphayo yikuthi aukuqedakali okunye okwenziwa ngamabandla aphikisayo angafuni ukuzwa ngitsho lakancane ukuthi asebenza lamanye ngesikhathi sokhetho.
