Bulawayo...............
lqembu lamakhosikazi ayizizalwane zeZimbabwe asebenza kweleSouth Africa eleZim Mbokodo banikeze isipho semvunulo yabesifazana nxa besesikhathini lesepa kumantombazana afunda eMzinyathini High School esiqintini seMzingwane ezansi yeMandebeleni ngenhlonso yokuthi bathole labo ithuba lokulondoloza ukuhlanzeka njengoba limphahla isibiza intengo ephezulu.
Inengi labesifazana abesenelisi ukuthenga imvunulo yokusebenzisa nxa besesikhathini ngoba intengo yayo iphezulu kakhulu okubangela ukuba inengi licine liphila nzima ngesikhathi besemfuleni.
UNkosazana Corance Ncube uchaza isizatho sokupha imvunulo yabomama kumantomabazana afunda ezikolo ezehlukeneyo ezweni.
“Uhlelo lokupha imvunulo siluqhuba ezikolo lasemajele ukuze abesifazane bazizwe bengabantu behlanzekile buye bakhona abanye bethu abakhulela ekhaya njalo bayazi ukuqakatheka kwemvunulo.”
Umbalisi eMzinyathini uNkosikazi Thandekile Ngwenya ubonga isipho semvunulo ethi sizanceda kakhulu abafundi.
“Siyabonga isipho semvunulo sizasiza kakhulu njalo sibonga abeQueens and Queens LeZim Mbokodo”
UBabongile Sibanda ongumkhokheli wabafundi abangamankazana elilunga ledale lephalamende emele ontanga eUmzingwane Constituency uthi bayabonga ngesipho semvunulo ngoba sizanceda kakhulu abanye abafundi.
“Sizahlala sihlanzekile siyadibonga isipho seZim Mbokodo esemvunulo ngoba abanye bethu bayayiswela.”
Bajabule abafundi abanengi ngoba vele inengi alisenelisi ukuyithenga emavinkilini ngenxa yokukhuphuka kwentengo, abanye sebephila ngesebenza kanengi lobanje kulodubo lwamanzi ngoba kumele ihlanjwe ihlale ihlanzekile.
Amankazana amanengi aweZimbabwe, njengawo wonke emhlabeni jikelele, asethomba esese mancane njalo akenelisi ukuzithengela imvunulo yokusebenzisa nyanga zonke. Abanye bacina besebenzisa izichibi ezingahlanzekanga okucina kudala imikhhlane. Kulezinye izigaba lapho ababikwa amantombazana esebenzisa ubulongwe benkomo obuwomisiweyo nxa besesikhathini.
Okwamanje ezweni imvunulo yabomama iqalela kumadola amathathu aweMelika-US$3 kusiya phezulu ngesizatho sohlonzi lwawo.
Inhlanganiso yeZim lmbokodo bathi banceda labesifazana abasemajele njalo ekupheleni komnyaka bazayakupha abafundi esikolo seMinda High School.