Umkhokheli webandla lezombusazwe eZimbabwe eleMthwakazi Republic Party, uMnu. Mqondisi Moyo, usekhuthaze izizalwane zakwele South Africa ukuthi zitshengise uzwelo kuzizalwane zeZimbabwe njengoba zingazikhethelanga ukuba kulelo lizwe.
Inkuthazo kaMoyo iza ngesikhathi kuqiniswa imizamo yokuxotsha abokuza kwele South Africa osokufike kubanga elethusayo. Izizalwane zakwele South Africa zithi abadabuka eZimbabwe kabaphume baphele kulelolizwe
“Isicelo sethu sithi kuma South Africans mayuyu ngoba vele lisigcinile okwesikhathi eside. Kungasi South Africa asazi ukuthi ngabe abantu bakoMthwakazi baphila njani ngoba abantu bonke ngomuzi ngomuzi kulabantwana kumbe abathathu abayibo abasebenzayo besapota imuli leziyana. Siyazi ukuthi uhulumende weZanu PF ugangile kusukisela ngo1980. Siyesabela ukuthi abantu bethi bangabahlukumeza khonangale, mhlawumbe baba phoyizene loba ukubenza laziphi izehlakalo abangafisa ukuthi bazenze kibo. Kanti ngakwelinye icele sinanzelela ukuthi uhulumende kaMnangagwa uyesaba kakhulu ibandla leMthwakazi Republic Party."
Inengi labeZimbabwe abahlala kwele Africa seliphilela evalweni ngemva kwamazwi awethusayo akamkhokheli webandla eliphikisazo elePatriotic Alliance, uMnu. Gayton McKenzie, othi aluba ungumongameli walelo lizwe ubezavala zonke izigubhu zomoya ezixhunywe ebantwini bokuza ezibhedlela ukuze bafe
Uthi ngesikhathi sokhetho lomnyaka ozayo bazangena indlu ngendlu bezingela abantu bokuza abangafuni ukubuyela kubo.
Ngakolunye uhlangothi izizalwane zakwele South Africa zivimbile esangweni lesibhedlela seKalafong ePretoria lapho ezalisa ukungena loba ngubani odabuka kwelinye ilizwe.
Umkhokheli walesi sibhedlela, uSello Matjila, uthi sebebize amapholisa baze bayadinga lomgoqo emthethwandaba owenqabela laba bantu ukuvimba amasango ezibhedlela kodwa konke lokhu akusizanga.
Uthi nxa benqabela ukungena esibhedlela wonke umuntu ongayisiso sizalwane sakwele South Africa kantike akwaziwa ukuthi abalemvumo yokuba selizweni bayabavumela kumbe hatshi.
Esinye isizalwa sakwele South Africa esingazivezanga igama esithumele izwi laso ehlelweni lokuxhumana olweWhatsApp, sithi kufanele kukhandwe icebo lokuthi bonke abantu bokuza abangena ezibhedlela bebulawe ngabongi.“Umjovo weCOVID usasekhona. Lina bafakeni iCOVID lena ivaccine le elethwe ngupresident wabo. Bafakeni ivaccine lina libavaccinethe ma kuthiwa kubalwa ama dryclean ama laundry kubalwe bona."
NgoLwesibili ephalamende amabandla aphikisayo abethwalise nzima UMongameli Cyril Ramaphosa esithi wenzani ngenkulumo ezethulwa ngumphathintambo wogatsha lwendaba zasekhaya, owogatsha lwezamapholisa kanye lophethe ezempilakahle esabelweni seLimpopo okusobala ukuthi baphendla umlilo wexenophobia.
URamaphosa uthe lokhu akusiqiniso.
Uthe izizalwane zakwele South Africa azilaxenophobia njalo yena akavumi ukuthi loba kulohlupho lwabantu bokuza besebedudulwa ngodlakela loba indlela engekho emthethweni.
URamaphosa uthi yena lenkokheli zamazwe aweAfrica bazaqhubeka bekhulumisana ngenjongo yokuqeda uhlupho lokungena kwabantu kweleSouth Africa ngokungekho emthethweni ngoba lokhu yikho osekubangele ukufuthelena okukhona khathesi.