WASHINGTON DC - Ugatsha olubona ngezemigwaqo, olweZINARA, solukhuphule imali ebhadalwa ngabezimota abadlula entubeni zama-toll gates.
Limali ekhwezelwe labo ababhadala ngedola leZimbabwe kuphela. Ugatsha lolu lukhweze linhlawulo njalo ekuqaleni kwalinyanga.
Abalezimota ezincane sebezabhadala inkulungwane eyodwa elekhulu lamadola, Z$1,100 kuthi abama-khombi bazabhadala inkulungwane elamakhulu ayisithupha alamatshumi amahlanu, Z$1,650.
Abamabhasi sebezabhadala inkulungwane ezimbili ezilamakhulu amabili, Z$2,200 kuthi abamaroli amakhulu bona babhadale inkulungwane ezinhlanu ezilamakhulu amahlanu, Z$5,500.
Unobhala jikelele wenhlanganiso emela izisebenzi, iZCTU, uMnu Japhet Moyo utshele iStudio 7 ukuthi ukukhwela kwenhlawulo yentuba zomgwaqo kuzabangela ukukhuphuka kwentengo yezinye izinto ezitolo.
