Uhulumende weZimbabwe useyalile ukuphawula ngodaba lwecala lokudlwengula elivulelwe uMongameli Emmerson Mnangagwa yisizalwane seZimbabwe esesihlala kweleAustralia, uNkosazana Susan Mutami.
Isizalwane seZimbabwe uNkosazana Susan Mutami oleminyaka engamatshumi amathathu lantathu uvulele uMnangagwa icala lokudlwengula enkambeni yamapholisa eMount Ommney Queensland eAustralia.
IStudio 7 izamile ukubuza kusikhulumeli sikahulumende weZimbabwe umnumnzana George Charamba ngaloludaba kodwa wahle wathi yindaba yobuthutha angafuni kuyiphendula.
UCharamba uthe yena akaphendulani lendaba elobuthutha phakathi.
Imizamo yokukhuluma loNkosazana Mutami ngaloludaba ibingakaphumeleli. Kodwa okuvela kubaba lakhe lolu alwethule ekhasini lakhe letwitter lokwethulwa ngabezindaba yikuthi umongameli Mnangagwa wafika esikolo sabo ngo 2003 esasengumphathintambo wogatsha lwezindlu. Uthi ngemva kokubingelela uMnangagwa watshela ababalisi ukuthi ungumzukulu wakhe wasemupha izigidi ezintathu zama bearer’s cheque wathi aze azombona emahofisini eZanu PF eKwekwe.
Uthi akazange aye lapho kwasekusithi ngelinye ilanga ezihambela edolobheni uMnangagwa wambona wambizela ehoteleni eGolden Mile lapho abafika badla khona ukudla kwemini ndawonye lezinye iziphathamandla zebandla leZanu PF.
Qede lapho wayangena laye endlini yakhe ehoteleni lapho afika wamdlwengula khona emtshela ukuthi uyamthanda kodwa engatsheli muntu ngaloludaba. Kuthe uyise kaNkosazana Mutami esebhubhile ngo2005, uMnangagwa waqala ukumthengela ukudla lokumbadalela esikolo. Qede lapho wambiza ukuzohlala laye epulazini lakhe eSherwood. Uthi-ke lapho wadlwengulwa amahlandla amanengi.
IStudio 7 izame ukuthintana lehofisi yomeli weAustralia eSouth Africa ukuzwa ukuthi kambe loludaba luzaphathwa njani njengoba icala livulwe eAustralia kodwa akekho obebamba ucingo kule ihofisi.
Ingcitshi kwezomthetho njalo eligqwetha, uMnu. Vusumuzi Sibanda, uthi akusoke kube lula ukuthi uMnangagwa abotshwe loba ukuthonisiswa ngaloludaba.
Uthi loludaba lungangena emthethwandaba kuphela nxa kungaba lokungenela kwephalamende.
USibanda uthi okunye okungenzeka yikuthi kube labalukhweza kunhlanganiso yezamalungelo ku United Nations belukhweza njengodaba lombusi obesebenzisa Amandla ombuso ukucindezela owesifazana.