Ukukhethwa kuka Nduna Fortune Charumbira ukuba akhokhele idale le Pan African Parliament engancintiswanga kwamukelwe ngabanye kodwa abanye besithi bekungamelanga akhethwe.
UCharumbira uthole amavoti alikhulu lamatshumi ayisithupha lanye, 161 kuthi abangamatshumi amathathu lanye, 31, bayekela ukuvota abalitshumi lanye, 11 bakiliza amavoti abo.
Ngokwakuqala ukuthi umuntu ovela emhlubulweni wezansi yezwekazi le Africa akhethwe ukukhokhela lelidale.
UCharumbira unqobe kulolukhetho engancintiswa muntu ngemva kokwaliswa ukuncintisa komeli wephalamende ovela eMalawi ngoba ukukhethwa kwakhe bekungahambelani lalokho okufanele kulandelwe.
Esethula inkulumo yokwemukela ukukhethwa kwakhe induna uCharumbira uthe uzakwenza konke okusemandleni akhe ukubuyisela isizotha sePan African Parliament ibe yindawo yokuthuthukisa iAfrica hatshi eyokulwa.
Idale le Pan African Parliament libunjwa yizigaba ezinhlanu zamazwe adabuka empumalanga, etshonalanga, ezansi, enkabazwe lenyakatho. Ngemva kodlakela lokhetho lwanyakenye, I African Union ilaye ukuthi ukukhethwa kwenkokheli zale iphalamande kuzakwenziwa ngokutshintshanwa phakathi.
Njengobake impumalanga, intshonalanga lenkabazwe yezwekazi beseke balithola ithuba lokufaka umongameli esihlalweni, iAfrican Union ithe inyakatho lezansi yibo kuphela okufanele bancintise kulolukhetho. OweMalawi obefuna ukuncintisa umnumnzana Charumbira ucine ekhitshwa njengoba ukukhethwa kwakhe bekungalandelanga indlela esetshenziswa yile iphalamende.
Enkulumeni yakhe yokwemukela umkhokheli wale iphalamende omutsha, Umngcinisihlalo wenhlanganiso ye African Union umnumnzana Moussa Faki Mohamat, ukhuthaze amalunga ale iphalamende ukuthi ekele ukulwa akhuthalele intuthuko yezwekazi.
Inengi labameli balelidala abadabuka emazweni asezansi bemukele kakhulu ukukhethwa kukamnumnzana Charumbira besithi besithi kuzapha loluluhlu ithuba lokusombulula inhlupho ababhekane lazo.
Okwamanje iPan African Parliament ayilawo amandla okwethula imithetho kodwa isebenza njengomxwayisi weAfrican Union.
