Abantu abanengi bathi bethuswa yikubulawa kwamalunga ebandla leCitizens Coalition for Change ngabacatshangelwa ukuba ngabadlelana lohulumende kaMongameli Emmerson Mnangagwa.
Ukubulawa kuka Nkosikazi Moreblessing Ali loLangelihle Zonda Moyo kwethuse abantu eZimbabwe abathi kukhanya engani lokhu kuhambelana lezokhetho. UMnu. Felix Magalela Mafa, ilunga le Citizens Coalition for Change, uthi kulusizi ukuthi abantu beZimbabwe baphila ngaphansi kodlame.
“Kulusizi njalo kulihlazo ukuthi abantu beZimbabwe sebephila ngaphansi kodlame ngenxa yokuthi kuzaba lama Election,Kanti thina singabantu abathanda ukuthula njalo iconstitution ilandelwe ngakho kutshengisa ukuthi ababusayo bayesaba ukudliwa .Ukufa kukaMoreblessing loLangelihle Kubuhlungu hatshi kithi sodwa iZimbabwe jikelele abantu amaprovince onke ayakusola kusikhumbuza umbuqazwe.”
Mfundisi Useni Sibanda, umqondisi wenhlanganiso eye Zimbabwe Christian Alliance, uthi izizalwane zonke zilelungelo lokuvikelwa nguhulumende kungakhathalekile ibandla alisekelayo.
"Kuyasikhathaza kakhulu ukuthi abantu sebelahlekelwe zimpilo zabo njalo kulabantwana asebesele bezintandane, kulezihlobo esezilahlekelwe. Siyakwazi ukuba isisekelo sombuso weZimbabwe, kungabe kungubani ola eZimbabwe ulelungilo lokuvikelwa nguHulumende ukuze angabulawa ngabanye abantu kumbe angathunjwa. Kufanele amapholisa aphenye ngoba nxa kutshiywe kunjalo yizinto eziletha ukukhathazeka ebantwini lokwesaba ngakho kuyabe kumele uHulumende akhangelele into enjalo, apholisa akwanise ukuthi abambe abantu abayenze lokhu.”
Umkhokheli webandla leMthwakazi Republic Party, uMnu. Mqondisi Moyo, uthi uhulumende obusayo ulobudlwangudlwangu.
“Kuyadanisa ukuthi it took amaZimbabweans 42 years ukuthi bananzelele kumbe babone ukuthi iZanu PF libandla lezikliwi lezigangi lababulali ngoba thina sihlala sikhuluma ukuthi iopposition ingaba yiCCC loba iMDC bonke babesupport iZanu PF ngabo early 80s abantu bebulawa ngombuqazwe eMatabeleland kithi asonto entsha lokhu.lZanu PF asikaze siyithathe njengebandla eliserious siyakwazi libandla lababulali.Umnyaka ozayo uzaba ngumnyaka onzima ngoba iZanu PF iyabonisa ukuthi ayikaguqhuki.”
UNkosikazi Sichelesile Mahlangu omele isigaba sePumula kudale lePhalamende uthi lokhu okwenzakalayo kuyethusa omama bacine behlehlela emuva ngokwesaba.
“Nxa sikhangela omama i50/50, omama isikhathi esinengi ngababuthakathaka nxa bebona into enje isenzakala sesizibuza ukuthi mina kungisa ngaphi kuyethusa kakhulu okwenza kale kuMoreblessing. Ubuhle bakhona yikuthi konke kungaphansi lomthetho sizabona ukuthi umthetho wakhona uzakhiphani, sikhangele ukhetho ngomnyaka ozayo sikhangelele i50/50 from kubomama ngibona kuzethusa izingalethu.”
UnNkosikazi Nonceba Gwebu uthi ukhetho okuzayo luzaba lodlame njalo abantu abasoze bavota bekhululekile.
“Abantu sebebsesaba ukusekela amabandla aphikisayo ngoba sekulengozi yokulahlekelwa yimpilo nxa ungophikisayo. Sekukhanya engani ngokhetho lomnyaka ozayo kuzakuba lodlame olunengi njalo alusoke lube lokuthula. Kuzaba lokuqilibezela lokubanjwa ngamandla okuzenza abantu bevote ngokwesaba. Lokuhlupheka lokhu esikubonayo kuzaqhubekela phambili.”
Okubandla leZanu PF, uMnu. Joseph Tshuma, uthi akumelanga abantu bebulalane ngenxa yezombusazwe.
Amalunga amabandla atshiyeneyo athi akhathazekile kakhulu ngoba lokhu sokubakhumbuza ukhetho luka2008.