IBulawayo Council Ithi Uzulu Sezahlawulela Ukuthwalwa Kwezibi Lokunye Ngemali Elesilinganiso Sedola leMelika
Bayakhala abantu koBulawayo kulandela umbiko owethulwe yikhansili othi izakhamizi zedolobho leli sokumele zihlawule imithelo etshiyeneyo ngemali ehambelana lesisindo sedola leMelika.
Ikhansili yethule umbiko lo namuhla isithi akusasebenzeki edolobheni leli ngoba ukugugudeka kwedola leZimbabwe sokwenza ukuba inhlawulo yezakhamizi iphelele emoyeni bengenelisi ukuthwala izibi, ukubalethela amanzi lokunye. Ikhansili ithi ukuhlawula imali elesisindo sedola leMelika kuqala kuyonale inyanga.
Isikhulumeli sekhansili, uNkosikazi Nesisa Mpofu, uthi zinengi izizatho ezenze ikhansili yathatha isinqumo lesi.
UNkosikazi Mpofu uqhubekele phambili ebonisa uzulu ngokusebenza kwesinqumo abasivunyelwe nguhulumende.
Abahlali bakoBulawayo bona bakhala ngokuthi sebephilanzima ngenxa yokuthi iholo labo seliphansi kakhulu njalo intengo yempahla ikhuphuka nsukuzonke.
Ukhathazekile uMnu. Ben Moyo, isakhamuzi sako Bulawayo.
UMnu. Mandla Tshuma, esinye njalo isakhamuzi sakoBulawayo, uthi kusobala ukuba imali yakuleli ayisela sisindo.
Ohlaziya ezomnotho, uMnu. Zibusizo Mkhwananzi, uncoma okwenziwe lidolobho lakoBulawayo esithi idola leZimbabwe kalisathengi lutho.
Ezinye izakhamizi zithi zilakho ukuthathelwa izindlu ngoba zizakwehluleka ukuhlawula imithelo etshiyeneyo ngedola elihambelana lele Melika.