Inhlanganiso ezizimeleyo zithi zizakhulumisana lohulumende zimkhuthaze ukuthi aveze ugwalo lweMaster Plan oluchasisa ukuthi uzaqhuba njani uhlelo lokuhlalisa kutsha abantu abazadudulwa eBinga sokusakhiwa idamu leGwayi-Shangani elikhangelelwe ukulethela izigaba zeMatabeleland amanzi eneleyo.
Uhulumende uthi uzakwakhela izakhamizi lezi, ezedlula amakhulu ayisikhombisa, izindlu zakulezi insuku njalo uzaxoxisana lazo ngendlela ezifuna uhlelo lokuhlaliswa kutsha kwazo luqhutshwe ngayo.
UMnu. Khumbulani Maphosa, umqondisi wenhlanganiso yeMatabeleland Human Rights Institute uthi akulabufakazi bokuthi ngempela uhulumende uzahlalisa kuhle abantu ngoba kungenzakala ukuthi kube lenkohlakalo kuloluhlelo.
Inhlanganiso yakhe yamanyana lezinye ezizimeleyo ezilitshumi lasithupha ezeMasvingo, Manicaland, Matabeleland, leMashonaland zalobela uhulumende ukuthi alandele limithetho engakasusi abantu ezigabeni zonke zelizwe lapho okuyabe kuqhutshwa inhlelo ezehlukeneyo.
Inhlanganiso lezi zithi kufanele uhulumende alandele isisekelo sombuso selizwe kanye lemithetho eyabekwa ngumanyano weUnited Nations.
Okunengi ngaloludaba asikuzweni kungxoxo uMnu. Maphosa ayiqhube loSithandekile Mhlanga weStudio 7.
