Johannesburg................. lnhlanganiso yomanyano wamazwe womhlaba eyeUnited Nations ithi ikhathazekile ngembiko elokucwasa phakathi egcona izwekazi leAfrica ngokuqhamuka komkhuhlane wemonkeypox.
Lumkhuhlane we monkeypox uza ngesikhathi lapho amazwe omhlaba ephakathi kokulwisana lobhubhane olwecoronavirus. Ngokutsho kwenhlanganiso yezempilakahle emhlabeni jikelele eyeWorld Health Organisation (WHO), sekulabantu abedlula amatshumi ayisitshiyagalolunye (90) asebetholakale belemonkey pox emazweni edlula itshumi.
Izizalwane seZimbabwe kwele South Africa zithi seziphilela evalweni kulandela ukuqhamuka kwe monkeypox kwamanye amazwe okungumkhuhlane owesatshelwa ukuthi ungaba ngumatshayabhuqe njenge Covid-19.
Isizalwane seZimbabwe kweleSouth Africa unkosikazi Nomalanga Dlamini uthi sebethuke kakhulu ikakhulu nxa bekhumbula inhlupho lezimfa ezidalwe yicoronavirus.
“Ngikhathazekile kakhulu ngale indaba yemonkeypox. Ngicabanga ukuthi sisuka kucovid-19 sisalamadepression lestress zecovid nanku okunye. Sizaphumula kwenze njani.Izibhedlela zethu ngale eZimbabwe azikho right ma kungadlulela khona sizokubamba sikuthini. Ngapha lathi eSouth Africa amaphepha awavumi. Awungeke uyeqhamuka esibhedlela kulabodudula awazi ukuthi bazafike bakutreate njani. Ngesifiso sami yikuthi bangayicontrola ingakagcwali ngapha eSouth Africa.”
Leyinto egcizelelwa ngesinye isizalwane seZimbabwe unkosazana Mavis Ncube yena othi besaba ukuthi sebengaqala ukuvalelwa futhi balahlekelwe yimisebenzi.
“Ibuye ingani iyisiqalekiso. Mhlawumbe uNkulunkulu uzama ukusipanitsha nge the way esesiziphilisa ngakhona. So ingabuye ibe yisiqalekiso esivela kuNkulunkulu.”
Kodwake ingcitshi zithi lumkhuhlane lobanje umemetheka awusiyongozi njengomkhuhlane wecoronavirus. Ingcitshi kweze mpilakahle eUniversity yeWitwatersrand umnumnzana Shabir Madhi uthi akufanelanga abantu bethuke kodwa kufanele baqaphele.
“Malutshwana amathuba okuthi umuntu abulawe yilo umkhuhlane. Awulamandla njengecovid-19 ngakho abantu abangesabi.”
Leyinto egcizelelwa yingcitshi kwezempilakahle eZimbabwe udokotela Marisa. UMarisa uthi lumkhuhlane lo awukhomutsha. Uqale ukutholakala emntwaneni ngo 1970 elizweni le Democratic Republic of Congo. Uthi awukhethi mhlobo njengoba uvele ususemazweni amanengi. Uthi umuntu angawuthola enyamazaneni Kona emagundwaneni. Kodwake uthi abantu balakho ukuwuthelelana ngamanzi a phuma emakhaleni loba emlonyeni.
“Awuqali lumkhuhlane. EDRC uhlasele abanengi wabulala abafika amakhulu amabili ngo2020 kodwa konke lokhu kwasithwa yicovid-19. Sekukhulunywa ngawo khathesi ngoba ususabalele emazweni amanengi.”
Uthi zibonelo zawo zibalisa umvimbano, ukutshaywa likhanda, lokuqubuka emzimbeni.
Okwakhathesi lumkhuhlane awukatholakali kweleSouth Africa loba eZimbabwe.
