Bulawayo..............
Alisoze liphatheke kumkhankaso wokudinga intshantshu zezwekazi lase Africa iqembu labesilisa elimela ilizwe emdlalweni wenguqu elamaWarriors.
Inhlanganiso elawula umdlalo wenguqu ezwekazi leAfrica eye Confederation of African Football yethule umbiko ngoMvulo isithi ilizwe le Zimbabwe kanye lele Kenya asekhutshiwe kulumncintiswano ngoba engalandelanga izeluleko zenhlanganiso ye Federation of International Football Association iFIFA.
Ophatheke emdlalweni wenguqu uAdmire Banda uthi lokhu kuzadala ukuba ilizwe le Zimbabwe lifulathelwe ngabadlali abanengi.
“Kudumaza abadlali. Abavele bedlalela iqembu lesizwe kanye lalabo abafisa ukudlalela iqembu lesizwe. Uzabona khathesi okuzakwenzakala yikuba kuzakuba labadlali abanengi abazakuma ukudlalela iqembu lesizwe ngoba sebekubona kungela ncedo ukuba yingxenye yeqembu lesizwe. Balesifiso esokuba bathuthukise ilizwe labo kodwa nxa kusenzakala ngalindlela labo uthando luyaphela. Kusiphazamise kakhulu futhi ekudlaleni kwethu kuligi esidlala khona ngoba khathesi sekunzima ukuba abafana bathengwe phandle kwelizwe ngoba samiswa ukuphatheka kunhlelo zonke eze FIFA,” kutsho uBanda.
Inhlanganiso elawula lumdlalo emhlabeni jikelele eye Federation of International Football Association (FIFA) imise ilizwe le Zimbabwe ukuphatheka kunhlelo zayo ngenyanga kaNhlolanja isethesa uhulumende weZimbabwe icala elokungenela ekuqhutshweni komdlalo wenguqu.
Lokhu kwenzakale ngemva kokuba inhlanganiso ye Sport and Recreation Commission imise umsebenzi inkokheli yenhlanganiso ebona ngokuqhutshwa komdlalo wenguqu elizweni eye Zimbabwe Football Association.
Abe SRC bamise umgcinisihlalo we ZIFA uFelton Kamambo labanye bakhe abagoqela uBryton Malandule kanye lo Philemon Machana bebethesa amacala awokungakhokheli kuhle umdlalo wenguqu elizweni.
Umnikazi weqembu le Golden White uKhotso Nyathi uthi abadlali bazalahlekelwa ngamathuba ngokungaphatheki kumncintiswano efana lowe Afcon.
“Abantu bakithi kasiyekeleni ubuhwaba, ngoba yibo obubangela konke lokhu, kasiziyehliseni. Lokhu sekusenza thina esilamaqembu singabi lendlela eyokuthi abadlali bethu bebonakale. Kufanele lathi siyencintisa kwabanye ngoba phakathi kwalabo abakhethiweyo sekungaba khona abangathengwa amanye amaqembu aphakame,” kutsho uNyathi.
Inhlanganiso ye FIFA izavumela ilizwe le Zimbabwe ukuba liphatheke kunhlelo zalo nxa kungabuyiselwa esikhundleni uKamambo labanye bakhe.
Sikhangele umdlalo kakhilikithi.
Iqembu labesilisa elimela ilizwe le Zimbabwe emdlalweni kakhilikithi linqotshwe ngama runs angamatshumi amathathu lambili ngele Namibia emdlalweni wesihlanu njalo ungowokucina owohlobo lwe Twenty20 oqhutshelwe enkundleni ye Queens Sports Club namhla emini.
Limpumela itsho ukuba iqembu le Zimbabwe linqotshwe ngele Namibia nge 3 ka 2 okuyinto eyethuse intathelizindaba yezemidlalo uDumi Praise Dlakama.
“Sibone abadlali abanengi abatshaya ibhola abeqembu lama Chevrons besehluleka ukuvikela iwicket labo. Bebelinika abe Namibia kalula njalo kuzakuba nzima kuqembu le Zimbabwe kumkhankaso walo owokuyadlala kumidlalo yezizwe zomhlaba njengoba nanku phela linqotshwa liqembu eliyi associate nation,” kutsho uDlakama.
Iqembu le Zimbabwe linqobe emdlalweni wakuqala ngama runs ayisikhombisa kwathi ele Namibia linqobe emdlalweni wesibili ngama wickets ayithoba minwe mbili, umdlalo wesithathu uphele iqembu le Zimbabwe linqobe ngama wickets ayithoba minwe mbili kwathi owesine uphele ele Namibia linqobe ngama wickets ayisithupha.
Ekuqaleni kwenyanga kaNhlangula iqembu le Zimbabwe likhangelelwe ukudlala leqembu le Afghanistan kumidlalo emithathu eyohlobo lwe One Day International, lemidlalo emihlanu eyohlobo lwe Twenty20.