Bulawayo.......Osomabhizimusi besifazana bakoBulawayo batshele ikhomidi yedale lephalanende ebona ngezentuthuko eyePortfolio Committee on Women Affairs Community Small and Medium Enterprises Development, ukuthi kungangcono ibhanga eleWomen Micro Finance Bank livalwe ngoba abesifazana abanengi bezigabeni zeMandebeleni kabenelisi ukuthola uncedo lokuzithuthukisa kilo njalo lesibambiso sokuphiwa isikwelede siphezulu kakhulu.
lnengi labosomabhizimusi abakade besemhlanganweni owenzelwe ko Bulawayo, labekomiti yedale lephalamende eye Zimbabwe Portfolio Committee on Women Affairs, Community, Small and Medium Entreprises Development liveze imibono ehlukeneyo abanye bencoma lelibhanga kuthi abanye bethi alilandeli abakuvumelanayo ngesikhathi lisungulwa.
UNkosikazi Portia Jamu wabosomabhizimusi abenelisa ukuthola imali beliqembu elithenga izibi edolobheni ubonga ukuthuthukiswa kwezomnotho libhanga.
“Imali besiyithola kuhle ebhanga saqala siyitholile sibuyisela ngeviki besesithole eyinye sesibhadala ngenyanga sikhangelele ukuthola eyinye eyokuthenga umtshina ogaya izibi uhlupho yikuthi abanye bathatha inali abayibuyiselanga bathi ngekahulumende.”
UNkosazana Natasha Moyo uthi kubalulekile ukuba ibhanga lifinyelele wonke usomabhizimusi bengabandlululi.
“Abesifazana bakhala ngokungatholi imali ngenxa yemali yesibambiso kubalulekile ukuba ibhanga libelenhlelo ezihambelana lendingeko zabomama baphume bahlangane labomama ngoba ngitsho lehololabo aliyeneli ukuba yicollateral.”
Obona ngenhlelo zabomama kubhanga leli phansi kogatsha lwamabhizimusi amancane uMnu Dingani Dlomo uchaze ukuba abalazo izisebenzi ezenelayo zokufinyelela bonke osomabhizimusi bakoBulawayo
“UBulawayo ulamaWard aphose afike amatshumi amathathu kodwa silezisebenzi ezinhlanu okutsho ukuthi asenelisi ukufinyelela wonke uMama okubhizimusi kuyadingeka ukuba sibelezisebenzi ukuze senelise ukufinyelela wonke usomabhizimusi.”
UMnu Khumbulani Dube webhanga leWomen Micro Finance Bank uchaza inani labantu asebenelise ukuthola imali lokhe ibhanga lasungulwayo
“lbhanga selenelise ukutholisa omama abedlula inkulungwane ezinthathu imali yokuncedisa amabhizimusi abo koBulawayo.”
Ngemva komhlangano amalunga edale lephalamende aveze ukukhathazeka ngenani eliphansi labosomabhizimusi besifazane asebenelise ukuthola izikhwelede kulelibhanga bethi lokhe lasungulwayo koBulawayo akula bufakazi bokuthi liyanceda.
Inengi labesifazana abangene lumhlangano bathi okufunakalayo uma usiyadinga imali ebhanga kunengi kakhulu abanengi abalakho okucina kubavalela phandle njalo akusikho okwavunyelwana kusungulwa ibhanga leli.
