Bulawayo....... Ngokuqansa kwenani labantu asebefunyanwa beleCovid-19 ngalesi sikhathi umqando usuqalisa uzulu ukhuthazwa ukuba alandele iziqondiso zokuzivikela kulolubhuhane kuthi abangakahlatshwa ijekiseni yokuzivikela baye emakilinika aseduze.
UNkosikazi Sitshengisiwe Siziba obona ngezempilakahle kukhansili yakoBulawayo uthi inani labantwana abahlatshwa ijekiseni le liphansi kakhulu ngoba abazali abaphi abafundi imvumo yokuhlatshwa esikolo.
“Siphakathi kohlelo lokuhlaba abadala amajekiseni avikela ukubambq icovid kodwa sesaphiwa lemvumo yokuhlaba abantwana abaleminyaka elitshumi lambili kusiya kwelitshumi lanhlanu ukuze sivikela wonke umuntu kulolubhubhane leeCovid-19. Udubo esilalo ngolwabazali abangaphi abantwana imvumo yokuhlaba kukanti uma bevikelekile kubanganeno ngoba bengabamba lumkhuhlane esikolo bayalawo emakhaya bayethelela abazali buye kuyanda ezikolo ukuthelelana iCovid.”
Uqhubekele phambili ethi balohlelo njalo lokubhalisa amacard awebulenjini, afakaza ukuthi umuntu sowahlatshwa ijekiseni le.
“Siphakathi kohlelo lokupha abantu amacard aleQR kulabo abalamadala siphinde sibafake ebulenjini ukuze loba bephandle ezweni bengabi lobunzima bokucalwa ngokuthi abahlabanga okupheleleyo.”
UMnu Byron Mpofu ofaka amacard abahlabileyo ebulenjini eTower Block koBulawayo uchasisa kabanzi ngabakwenzayo
“Saphiwa imvumo lugatsha lwezempilakahle ukuthi sifake amagama alabo asebahlaba baphelela ebulenjini ukuze bethi bephima ezweni kubelobufakazi bokuthi bavikelekile kubhubhane lweCovid njalo uma umuntu ezofakwa ebulenjini uzalencwadi zakhe zokuhlaba kanye lsithupha ukuze kubelesiqiniseko sokuthi konke kuqondile.”
UMnu lnnocent Gabadela uthi sewahlaba kathathu lamuhla uze ukuzobhalisa okufakaza lokho ebulenjini.
“Ngahlaba amajekiseni ami wonke eCimas eyokucina ngivela yihlaba sengizofaka igama lami lapha ebulenjini ukuze ngihlale ngisehlelweni. Kuqakathekile ukuhlanganisa ngoba lumkhuhlane is uthe the impilo zabantu abanengi emhlabeni njalo seluqale phansi lolubhubhane.”
Umongikazi kukhansili yakoBulawayo uNkosikazi Nokuthaba Mafu uthi abazali bananzelele sekuqhamuke umkhuhlane wendingindi.
“Sekuqhamuke umkhuhlane wendingindi ngakho abazali kumele bahlale beqaphele benanzelele abantwana bayaqala bekhala besenwaya besiba lamaqhubu umzimba wonke bengadli kuhle ngakho kuqakathekile ukuba libagijimisele emakilinika lingabona bengathi bakhathazekile emzimbeni ngoba iwile indingindi kulezinsuku.”
Lisiyatshona ilanga layizolo besekulabantu abahlolwe bafumanwa belegcikwane leCovid-19 abedlula amakhulu amathathu-327 kodwa akulamuntu osethe wabulawa yilo umkhuhlane lobanje inani labalaliswa ezibhedlela liqonga. Asebehlabe okwakuqala sebesedlula izigidi eziyisithipha-6 144 240, asebehlabe okwesibili bedlula izigidi ezinengi- 4 395 586 kuthi asebehlabe okwesithathu sebesedlula inkulungwane eziyisikhombisa lengxenye- -755 752. Ezweni jikelele kulaliswe abantu abaphose bafike amatshuma amahlanu 48.