Usephelelwe ngumsebenzi umqeqetshi weqembu lomdlalo wenguqu ele Highlanders, uMandla Mpofu, esetheswa umlandu wokungasuthisi abaqondisi baleliqembu kanye labalandeli ngomsbeenzi wakhe, ngemva kokungadlali kuhle kweqembu leli okwengxenye yeseason.
UMpofu ubikwa exotshwe ndawonye lomsekeli wakhe uBekithemba Ndlovu kanye lokhangela abadlali uVezigama Dlodlo kuthi osanda kuqhatshwa ukuba ngomunye wabaqeqetshi beqembu uJoel Luphahla nguye ozabe eziphethe esidukwini kusadingwa umqeqetshi omutsha.
Intathelizindaba yezemidlalo uFortune Mbele uthi bekuvele kusobala ukuba uMpofu akusensuku zatshwala engaphelelwanga ngumsebenzi.
“Kumidlalo elitshumi lantathu, singabali leyi engaphelanga eye FC Platinum lowe Dynamos, unqobe kumidlalo emithathu kuphela. Udliwe kathathu waba ngutshiki lobhanqa emidlalweni eyisikhombisa. Bekusegcekeni nje ukuthi uyaxotshwa njengoba inkokheli zeqembu zathi zifuna isicoco njalo ngendlela osekudlalwe ngayo akula sicoco ebesizathathwa,” kutsho uMbele.
Umgcinisihlalo weqembu le Highlanders uJohnfat Sibanda ukhulume ekuqaleni komnyaka wathi lonyaka bafuna isicoco seligi kodwa ngemva kwemidlalo esidlaliwe iqembu le Highlanders lilemiklomelo elitshumi lesithupha njalo litshiywa ngemiklomelo elitshumi lanhlanu liqembu elihlezi phezu kwengalane ele Chicken Inn.
Intathelizindaba yezemidlalo uNash Mkokwayarira uthi iqembu le Highlanders lixotshe uMpofu ngesikhathi iqembu lakhe selidlala ibhola elinathisa amanzi.
“Indlela eliqembu lakhe elidlale ngayo imidlalo esanda kwedlula, ebalisa lalo eliwudlale leqembu le Dynamos, ebeliphezu kwengalane kodwa bona balikhulela. Ngokubona kwami iqembu le Highlanders beselidlala kuhle, besekusele nje ukuthi lihlohle amathuba eliwatholayo,” kutsho uMkokwayarira.
Abasiki bebunda bathi umqeqetshi oyisizalwane selizwe le South Africa uGavin Hunt kumbe uHendrikus Pieter de Jong, oyisizalwane se Holland njalo oke waqeqetsha iqembu le Bosso, yibo abangathatha isikhundla lesi esesitshiywe nguMpofu.
Sikhangele umdlalo kakhilikithi.
Iqembu labesilisa elimela ilizwe emdlalweni kakhilikithi, lona elaziwa kakhulu ngegama elithi Chevrons, linqobe ele Namibia ngama runs ayisikhombisa emdlalweni owohlobo lwe Twenty20 namhla enkundleni ye Queens Sports Club ko Bulawayo.
Iqembu le Zimbabwe yilo eliqale ukutshaya ibhola labuthelela ama runs alikhulu elilamatshumi amahlanu lane (154) lilahlekelwe ngabadlali abane.
Kuthe ele Namibia seliphendula lenelisa ama runs alikhulu elilamatshumi amane lesithupha.
Ocubungula ezemidlalo uDumi Praise Dlakama uthi iqembu le Zimbabwe lizibeke esimeni esihle ngokunqoba namhla.
“Iqembu lama Chevrons liqalise kuhle emdlalweni walo owe T20 eliwudlala le Namibia enkundleni ye Queens Sports Club ngokunqoba elikwenze namhla emini.
Sekusele ukuthi iqembu leli liphenduke ngoLwesine sibone ukuthi lizakwenza njani ukuze linqobe kulimidlalo eliyidlala lilungiselela umkhankaso owokudinga amaqembu azakuyadlala kumidlalo yezizwe zomhlaba,” kutsho uDlakama.
Ukaputeni weqembu leZimbabwe uCraig Ervine nguye okhethwe ukuba ngumdlali odlale okwedlula abanye ngemva kokuba etshaye ama runs angamatshumi amahlanu lanhlanu (55).
Umdlalo wanamhla ngowokuqala kwemihlanu eyohlobo lwe Twenty20 ezadlalwa ngamaqembu lawa njalo yonke limidlalo izadlalelwa edolobheni lako Bulawayo enkundleni ye Queens Sports Club.