Inhlanganiso elawula umdlalo wenguqu esigabeni saphezulu ese Premier Soccer League isimise yonke imidlalo yesigaba lesi ngemva kokuqhamuka kobudlwangudlwangu obuphinde baphazamisa umdlalo obuphakathi kwamaqembu omdlalo wenguqu amakhulu elizweni athi ele Highlanders kanye lele Dynamos ngeSonto.
Umbiko olotshwe yisiphathamandla senhlanganiso ye Premier Soccer League, uKennedy Ndebele uthi imidlalo yonke isimisiwe ngemva kokuba sekusiba yinhlalayenza ukuba lodlakela enkundleni zomdlalo wenguqu.
UNdebele uthe ngoLwesihlanu mhla zingamatshumi amabili kuNkwenkwezi bazahlangana bonke abaphathelane lokuqhutshwa kwemidlalo yenguqu elizweni ukuze kudingwe indlela zokuqeda lelihlazo eselingcolise isimo somdlalo wenguqu elizweni
Olandela umdlalo wenguqu uWashington Sibanda, laye obengomunye wezibukeli ebezithe gwaqa enkundleni yeBarbourfields ngeSonto, uthi ukungajezisi abadlali okwenziwe ngunompembe uJimmy Makwanda yikho okubangele ukuba umdlalo ucine ungafikanga emaphethelweni.
“Mina ngombono wami unompembe bekumele umdlalo awubambe ngcono. Ngibona angani kuhle kwamehlula umdlalo uqala ngoba bekukhona abadlali abakade bedlala befuna ukulimaza abanye njalo bekumele ahle atshengise ukuba nguye ophetheyo ngokuhle akhuphe amakhasi akhe. Lokho bekuzakwenza abadlali bakubone ukuba akafuni abadlali abadlala befuna ukulimaza abanye,” kutsho uSibanda.
Umdlalo umiswe okwakuqala ngemva kokuba imvimbi yeqembu le Highlanders uAndrew Tandi elinyazwe inqagala ngumgadli osakhulayo oweqembu le Dynamos uBill Antonio lapho abalandeli beqembu le Highlanders abatshinge kakhulu befuna ukungena enkundleni.
Uphinde wamiswa njalo ngemva kokuba iqembu le Highlanders selihlohlile lapho abanye abalandeli beqembu le Highlanders abathabe baze bangena enkundleni ikanti abadlali kanye labalandeli be Dynamos bona bahlasela unompembe labanye bakhe.
Ocubungula ezemidlalo uDumi Praise Dlakama uthi ukuphakama kwabadlali betshingela unompembe lakho yikho okudala ukuba abalandeli babe lokufuthelana.
“Abadlali bethu labo yibo abakhwezela ukuba abalandeli bajikijele izinto enkundleni. Kumele silungisise khonapho ukuba abadlali kumele bafunde ukwamukela isinqumo esiyabe sithethwe ngunompembe. Kumele kube lendlela zokukhalaza ezingasizo ukuhanqa unompembe,” kutsho uDlakama.
Intathelizindaba yezemidlalo uNash Mkokwayarira uthi ubudlwangudlwangu budalwa yikuswelakala kwemfundiso.
“Ngokubona kwami kumele kube lemfundiso enkulu ukuze kungabi lobudlwangudlwangu ezinkundleni.
Kumele kufundiswe abadlali ukuba baziphathe njani nxa unompembe esethethe isinqumo ayabe esithethe kuphindwe njalo kufundiswe labasekeli,” kutsho uMkokwayarira.
Ensukwini ezedluleyo umdlalo obuphakathi kweqembu le FC Platinum lele Highlanders enkundleni yeMandava lawo awufikanga emaphethelweni njalo isimbalwa eminye imidlalo lapho okubekhona izehlakalo zodlakela.
Imidlalo ibisifike kuviki letshumi lanhlanu ngesikhathi inhlanganiso ye PSL ithatha isinqumo esokuba imiswe.