Abatsha abamabandla ezombusazwe amakhulu kwele Zimbabwe agoqela elibusayo ele ZANU PF, laphikisayo agoqela ele CCC lele MDC T lamanye, bahlangene Ngomvulo bekhuthazana ngokulondoloza ukuthula ngesikhathi sokukankasela ukhetho lomnyaka ozayo luka 2023.
Lumhlangano wenziwe ngesikhathi ele Zimbabwe lilungiselela ukhetho lomnyaka ka 2023 sokuqalile ukufuthelana kwabantu abalemibono ehlukileyo kwezombusazwe njengalokho okubonakala e Chitungwiza ngempelaviki.
Abakhulume kulumhlangano bathi kuqakathekile ukuba bahlangane zikhathi zonke ukuze kube lokuthula elizweni ngesikhathi sokhetho.
UMnu Steven Chuma oyisikhulumeli sabatsha kubandla le CCC uthi bayathokoza ukuba babuthaniswe ngesikhathi ilizwe lilungiselela ukhetho.
“Kuyinto enhle leyi ngoba kasilasikhathi sokuhlangana njengabatsha kumabandla ahlukeneyo. Lobanje kungaba lenguquko nxa sebesenza eminye imihlangano ukuba balethe abatsha kulokubisa abantu asebeleminyaka edlula 40”
Lokhu kugcizelelwe ngu Mnu Lameck Chimanyiwa owe bandla le ZANU PF uthi njengabatsha bayaqakathekisa ukuba kube lokuthula kwele Zimbabwe.
“Sifuna ukubonga abenze lumhlangano ngokubisa abamandla ehlukeneyo. Kuyasincedisa ukubambanisa abatsha, ukuze sazi uku kungelani lamabandla ethu singabantwana be Zimbabwe”
Omholi we nhlanganiso ye 4H uMnu John Muchenje uthi njengenhlanganiso bazaqakathekisa ukuba bahlanganise abatsha esithi ukuthula kuqala ngokubambanisa abamandla ezombusazwe.
“Umuntu ulakho ukukhetha ibandla lakhe. Yikho esikufunayo lokhu. Sifuna ukuba bazi ukuba bangabantu banye kungelani lamabandla abakiwo”
Ingcitshi kwezombusazwe uMnu Robert Dube uncome inhlanganiso eye 4H eqoqe lumhlangano esithi kuqakathekile ukuxoxisana ukuze kube lokukhumisana umlotha.
“Kuyinto enhle eyenziwe yinhlanganiso leyi ukuhlanganisa intsha yezombusazwe. Kuyinto eqakathekileyo kakhulu ngoba intsha isetshenziswa ukwenza udlame”
Ugcizele ukuba lokhu kumele kuqhubeke ngesikhathi lizwe lisiya ku khetho luka 2023.
“Nxa sithola inhlanganiso ebuthanisa abatsha laba behlale ndawonye bebonisana ukuthi ukhetho ngolokuthuthukisa ilizwe sekhathi zingaba zinengi inhlanganiso ezingenza kube lokuthula”
Inhlanganiso eye 4H iqoqe umhlangano owenzelwe kweyinye ihotela e Harare, lapho inkokheli yabatsha bamabandla ehlukeneyo ezombusazwe ithe gwaqa ukuze bakhulumisane ngamalungiselelo okhetho lomnyaka ozayo, bekhuthazana ukukhankasa ngonanzelelo njalo okungela dlakela laloba betshiyana ngemibono njengoba bephuma kumabandla ehlukeneyo.
Isehlakalo lesi ngesakuqala selokhe kwenzakala okufanayo ngomnyaka ka 2013 lapho ibandla elibusayo lamabandla aphikisayo ayebambene ekwenzeni okwehlukeneyo ukuze ilizwe livote ngokuthula phansi kwenhlanganiso ye JOMIC ngalesosikhathi.
Ekhuluma emhlanganweni munye, isikhulumeli se ZEC uMnu Justice Mangwana ukhuthaze abatsha ukuba bengalaleli amazwi okuba ukhetho luyaqilwa elizweni esithi kumele baqakathekise ukubhalisela ukuvota njalo bavote ngobunengi.