Umqeqetshi weqembu lomdlalo wenguqu ele Highlanders uMandla Mpofu ukhathazekile ngabadlali bakhe abangezwa kuhle ngemva kokuhotsha intuthu ehitshayo ngempela viki eyedluleyo.
Iqembu le Highlanders lizadibana lele Chicken Inn ngeSonto enkundleni ye Barbourfields njalo uMpofu uthi isifisosakhe ngesokuba abe ehlome waphelela.
“Umdlalo lowu esiwulandayo ngumdlalo omkhulu kakhulu. Ngiyabe ngifisa lami njengomgqeqetshi ukuba labadlali bami bonke kodwa umdlali wami odlala emuva uAndrew Tandi ihlombe lakhe laphuma, okokuthi nguye engicabanga ukuthi mhlawumbe ngingacina ngingelaye ngeSonto sidlala le Chicken Inn.
"Kukhona njalo abadlali ababili abathi uNqobizitha Masuku kanye lo Stanley Ngala abangezwa kuhle ngemva kokuhotsha intuthu ehitshayo eZvishavane. Ngilethemba kodwa ukuba nxa kwehlule ukuba babekhona labo abazathatha indawo zabo bazenelisa ukuba bethuthukise iqembu liyephambili,” kutsho uMpofu.
Iqembu le Highlanders lingena kumdlalo wangeSonto lilemiklomelo elitshumi lane ikanti ele Chicken Inn lona lilemiklomelo engamatshumi amabili lesithupha.
Umdlali osakhulayo uDarlington Munkuli, yena othethwe kuqembu labasakhulayo ele Bosso 90, uthi ulethemba elokuba iqembu le Highlanders lizathatha yonke imiklomelo ngeSonto.
“Njengeqembu sazitshela ukuba nxa sidlala enkundleni ye Barbourfields kumele sithathe yonke imiklomelo yomithathu ngakho sizazama ngamandla ethu wonke ukuthi siyithathe yonke imiklomelo ngeSonto,” kutsho uMunkuli.
NgoMgqibelo amanye njalo amaqembu ako Bulawayo azadibana enkundleni yeBarbourfields lapho iqembu le Bulawayo City elizemukela khona ele Bulawayo Chiefs.
Umqeqetshi weqembu le Chiefs uNilton Terroso uthi lumdlalo uyafana nje leminye kungakhathelekile ukuba badlala labafowabo.
“Ngokubona kwami iqiniso elikhona njengomqeqetshi yikuba akulanto entshintshayo ngenxa yokuba sidlala laliphi iqembu. Siqhubekela phambili sihlela lokulungiselela ngendlela efanayo ngoba okusemqoka yikunqoba,” kutsho uTerroso.
Kweminye imidlalo yangoMgqibelo iqembu le Herentals lizadlala lele FC Platinum ngase National Sports Stadium, iqembu le Black Rhinos lizemukela ele Tenax ngase Sakubva, iqembu le Ngezi Platinum Stars lizangqikilana lele Harare City ngase Baobab, kuthi iqembu le Whawha lizadibana lele Dynamos ngase Ascot.
NgeSonto iqembu le Manica Diamonds lizadlala lele ZPC Kariba ngase Sakubva kuthi iqembu le Caps United lizadibana lele Cranborne Bullets ngase National Sports Stadium.
Emdlalweni odlalwe namhla iqembu le Yadah libe ngutshiki lobhanqa 1 ka 1 lele Triangle enkundleni ye National Sports Stadium.
