Umbukiso omkhulu wabosomabhizimusi owe Zimbabwe International Trade Fair walonyaka, uyaqala kusasa koBulawayo. Abenkampani eqondisa lumbukiso bathi sokubhalise osomabhizimusi abedlula amakhulu amahlanu abaveze isifiso sokuzabukisa lonyaka.
Kuyaphithizela kuluthuli koBulawayo ngaphambilini kokuqala kusasa kombukiso wezokuthengiselana owe Zimbabwe International Trade Fair kuze kuyefika iNsonto kulabasomabhizimusi abasuka phetsheya kolwandle, ezwekazi leAfrica lawaphakathi kwelizwe.
Umgcinisihlalo wenkampani yeZimbabwe International Trade Fair, uMnu Busisa Moyo uchasise kabanzi ngombukiso walonye emhlanganweni lentathelizindaba owenzelwe khona eZITF, koBulawayo.
“Umbukiso omkhulu wabosomabhizimusi iZITF 2022 uyaqala kusasa siyajabula ngendlela osomabhizimusi abasukumele phezulu ngayo belungisela lumbukiso sikhuluma nje inengi labo sebefikile bazatshona lamuhla belungisa indawo zabo zokubukisela andubana kuqale umbukiso kusasa. Ngalesi isikhathi amankampani adlula amakhulu amane sebhalise ukuzobukisa amabhizimusi abo. Kuwonalawo kuzabe kulamazwe alitshumi lane avela kwamanye amazwe azabe ebukisa impahla ezenziwa kubo. UMongameli Emerson Mnangagwa nguye okhangelele ukuzovula lumbukiso. Sinxusa uzulu ukuthi aze kulo umbukiso abadala bazahlawila amadoda amahlanu emelika okulingana lemali yakuleli kuthi abantwana bazahlawila amathathu."
Umnu Moyo uqhubekele phambili echaza ngokulandelwa Kweziqondiso zeCovid-19 ngamalanga ombukiso weZITF.
“Ngesikhathi sombukiso iZITF izalandela iziqondiso zeCovid-19. Ngelanga umongameli evula okusemthethweni lumbukiso bonke abazafisa ukuya lapho akhona kumele bakho Lee iCovid-19 bezelobufakazi balokho ukuze bangene kulo umbukiso.”
Umphathintambo wakoBulawayo uNkosikazi Judith Ncube uthi wamukela nganjabulo enkulu izethekeli ezize kulelidolobho zilanda umbukiso oweZITF.
“Kuliviki siyamukela izethekeli zethu eziza kumbukiso weZITF siyabonga njalo lizizwe lisekhaya. Ngithanda ukulazisa ukuthi abantu bakoBulawayo balobuntu njalo bayebelisa ukuphila labanye abantu.”
Ingcwethi ezicubungula ezomnotho zithi umbukiso weZITF uzaletha ibhizimusi edolobheni leli kanye laselizweni jikelele.
Ohlaziya ezomnotho uMnu Zibusiso Mkhwananzi ulombono ofanayo.
“Ngalesisikhathi kubalebhizimusi ngapha koBulawayo kuba lokuntshintshana kwemali enengi ezandleni zabantu okuthuthukisa izamba zabantu.”
Umbukiso walonyaka ogijima ngendikimba ethi “Rethink, Reimagine, Reinvent. Value Chains for Economic Development uyaqala Mhlaka 26 Mabusa uze uyephela mhlaka 30 Mabasa.
UMongameli Uhuru Kenyatta weleKenya obekhangelelwe ukuvula umbukiso weZITF walonyaka, kaseyi kubuya kulandela ukubhubha kuka Mnu Mwai Kibaki owayengumongameli weleKenya. UMongameli Emerson Mnangagwa nguye owethule lezi saziso kuthange eHarare.
Mhlaka 26 kusiya ku28 Mabasa ngamalanga ababukisayo okuzaba lemihlanganao ehlukeneyo egoqela iZITF Innovators Forum, ZITF Business Conference, iConnect Africa Symposium leDiplomats Forum.
Kusukela Mhlaka 29 kusiya ku30 Mabasa iZITF 2022 izavulelwa uzulu. Umongameli Emerson Mnangagwa nguye osekhangelelwe ukuvula okusemthethweni umbukiso walonyaka NgoLwesihlanu, Mhlaka 29 Mabasa.
