Abamabandla aphikisayo ezombusazwe e Zimbabwe labalwela amalungelo oluntu bayamsola uhulumende ngokuvota bengasekeli ukuxotshwa kweRussia kukhansili ebona ngokulondolozwa kwamalungelo oluntu enhlanganisweni yomanyano wamazwe womhlaba eye UN Human Rights Council ngenxa yokuhlasela ekwenza kwele Ukraine kanye lokubulala abantu mahlayana abangahlomanga. Ele Zimbabwe yilo lodwa ilizwe langezansi yezwekazi ye Africa kuSADC elivote lisekela ele Russia ngoba amanye amazwe awe SADC ekhethe ukungavoti esekela loba ukungasekeli.
Lanxa ele Zimbabwe kuyilo lodwa elivote liphikisa inyathela leli, i-Russia icine ixotshwa ngemva kokuba amazwe womhlaba angamatshumi edlula athobamunwemunye-93, evote esekela. Amazwe angamatshumi phose ayisithupha-58, abikwa ekhethe ukungavoti. Avote engasekeli ukuxotshwa kwe Russia abe ngamatshumi amabili lane-24, agoqela eleZimbabwe leleChina.
Inengi lamabandla aphikisayo labenhlanganiso ezilwela ilungelo loluntu eZimbabwe liveze ukungajabuleli inyathelo lokuvota kukahulumende engasekeli inyathela leUnited Nations Human rights council lokuxotsha eleRussia ukuba lilunga lisithi kuveza ukuba uhulumende akaqhakathekisi ukulondolozwa kwelungelo loluntu.
Ngomnyaka ka 2008 eleRussia leleChina aphikisa ukwethulelwa kwe Zimbabwe izijeziso zenotho ngamazwe awenhlanganiso yomanyano wamazwe womhlaba owe United Nations ngemva kokuqhutshwa kokhetho olwalulodlakela olwethusa abanengi ngaleso sikhathi lapho okwabulawa khona abantu abanengi kwanyamalala abanye, lempumela yokhetho yaqeda inyanga yonke ingaphumanga yathi isiphuma kwatholakala ukuthi ibandla leZanu PF lalinqotshiwe ngesilinganiso esincane kwakhokhelela ekuphindweni kwalolukhetho i-run off.
Ingcwethi ezicubungula ezombusazwe zithi amazwe amanengi awezwekazi le Africa ancediswa ngele Russia lele China empini yawo yenkululeko embusweni wabamhlophe ababethumbe lawo mazwe, okuyikho okubangele ukuthi inengi lawo likhethe ukungavoti lingasekeli cele kodwa amanye aphuma mgceke avota esekela ele Russia anjenge Zimbabwe, Algeria, Burundi leEthopia.