Inhlanganiso ezimela intathelizindaba eZimbabwe zithi zizaphuma leziqondiso zokulawula umsebenzi wazo nxa uhulumende engaqhubeka emadolonzima ngokuphuma lomthetho wokuzilawula ngokusebenzelana lazo (co-regulation).
Lokhu kuza ngemva kokuba uhulumende eyehluleke ukutsho ukuba intathelizindaba zizalawulwa ngumthetho wuphi.
UMnu. Lenox Mhlanga, omele inhlanganiso yeVoluntary Media Council of Zimbabwe (VMCZ), uthi intathelizindaba sokumele zikhokhele kumanyathelo amele athathwe kuloludaba.
“Kuqakathekile ukuthi onozindaba bazimele njalo bebe ngabantu abakhangela impilakahle yabo. Lokhu kuqakatheke ngokuthi engangenela akusela liphi icele uhle angene ngesicathulo”
Okugcizelelwe ngeyinye intathelizindaba uNkosana Dlamini yena othi bafuna umthetho ozabalawula bezimele.
“Ungananzelela kungumkhuba omuhle mhlaba wonke ukuthi inhlanganiso zizemele. Singakhange;e odokotela, amagqwetha labanye bayazilawula.”
Omunye obe esemhlanganweni lo, uMnu. Nkululeko Sibanda, uthi njenge ntathelizindaba bakhathazekile ngomthetho ofuna ukwethulwa nguhulumende engakhulumisananga labo.
Kodwa umsekeli kamphathintambo wezokwethulwa kwemibiko, uMnu. Kindness Paradza, uthi uhulumende uselungisa lumthetho.
“Okwakuqala laba abasolayo baphuza ukuletha impendulo. Sabanikeza isikhathi njengogatsha sabathi basinikeze, behlukela ndawonye leZMC. Njengo gatsha lwezendaba sesabhala njalo umthetho lo usuku qgwetha lelizwe.”
Umphathintambo wezokukhitshwa kwemibiko izolo uthe uhulumende usecabange ukwethula umthetho olawula intathelizindaba oweMedia Practitioners olakho ukuphuma ngenyanga ezayo, ngemva kokwehluleka ukuthola imibono yenhlanganiso lezi zimela intathelizindaba.