Amasela alitshumi lanye abotshwa ngemva kokudutshulwa ngamapholisa kwabanye bawo eRosettenville eJohannesburg amiswe emthethwandaba ngoLwesithathu lapho okuvezwe ngokusemthethweni ukuthi abanye babo yizizalwane zaseZimbabwe.
Amapholisa ahlomileyo abegcwele phandle laphakathi emthethwandaba eJohannesburg Magistrate court ngesikhathi abetheswa amacala laba bemiswa phambi komthethwandaba.
Umtshutshisi utshele umthethwandaba ukuthi phakathi kwabalitshumi lanye laba, sekusaziwa ukuthi abathathu babo yizizalwane zeZimbabwe. Phakathi kwabo sekuvela njalo ubufakazi bokuthi bakhona abangelamvumo eqondileyo yokuba kwele South Africa.
Ababotshiweyo laba betheswa amacala ayisitshiyangalombili okubulala, amanye okuzama ukubulala, ukuthwala izikhali ezingekho emthethweni, lokuhlela ukutshontsha imali emoteni ethwala imali.
Isikhulumeli seviyo labatshutshisi, uNkosikazi Phindi Mjonondwane, utshele abezindaba ukuthi amapholisa alokhu esaqhubeka ngokuqinisekisa amakheli ebabotshiweyo, qede lapho bazanikezwa ithuba lokucela ukuhlawula imali yebail ukuze icala lithethwe bephandle.
“Omunye wezizalwane zaseZimbabwe lezi ubevele ephika ephandle ngemva kokuphiwa uxolo.”
Ukuvela ngokusemthethweni ukuthi kulezizalwane zeZimbabwe kuleli qula sekudanise abanengi kakhulu abeZimbabwe. Isizalwane seZimbabwe, uMnu. Greatman Mkhwebu, uthi lokhu kuzaqinisa inkulumo yalabo abathi abakwamanye amazwe abaxotshwe kweleSouth Africa.
“Noma kade befuna ukusikhipha ngendlela abasikhipha ngayo kodwa ma beyabona sitholakala ezenzweni zobugebenga definitely ubufakazi balabo ukuthi siyaganga. Noma bekhona abangama South African abagangayo ekugcineni igama liyovela ukuthi amaZimbabwe yiwo afundisa ama South Africa ukuganga and sizakuphika kanjani lokho ngoba each and every corner sikhona. Thina lathi asike sisiqoqeni singamaZimbabwe. Sesingakhala sithi iSouth Africa iyazixotsha kodwa ke okunye yizenzo zethu ezingalunganga la eSouth Africa.”
Le yinto egcizelelwa ngesinye isizalwane seZimbabwe uMnu. Nelson Ndlovu.
“Actually, kusuka kujustifaye okwenziwa nguhulumende wakuleli in terms of imithetho lemigoqo ayifakayo to reduce migration of foreigners coming into South Africa.”
Ababotshiweyo laba bebeyingxenye yamasela angamatshumi amabili lanhlanu (25) adubulana lamapholisa kumaviki ambalwa edluleyo ngesikhathi behlela ukuyatshontsha imali emoteni ethwala imali. Ngesikhathi sokudubulana lokhu kwafa amasela ayisitshiyagalombili abanye babaleka. Amapholisa awakavezi ukuthi kwabafileyo laba bangaki abeZimbabwe.