Amabandla ezombusazwe aqhubekela phambili ekhankasela ukhetho oluzakwenziwa ngenyanga ezayo. Kulamanye njalo amabandla athi kawangenanga kukhetho lolu ngoba akukaguqulwa indlela okuqhutshwa ngayo ukhetho eZimbabwe.
Sebegcwele ezabelweni lemadolobheni abakhankasela ukusekelwa nguzulu kukhetho oluzayo. Ibandla leZanu PF lithi uqhubeka kahle umkhankaso wabo. UMnu. Believe Gaule, ilunga lebandla leli, uthi basebenza kahle lozulu.
UMnu. Witness Dube, okubandla leMDC-T ekhokhelwa nguMnu. Douglas Mwonzora, uthi uqhubeka kahle umkhankaso wabo.
Kodwa uMnu. Mqondisi Moyo, umkhokheli webandla leMthwakazi Republic Party, uthi kuyamangalisa ukuba kulamabandla angene kukhetho lolu loba kungakaguqulwa indlela okuqhutshwa ngayo ukhetho.
UDokotela Nkululeko Sibanda, isikhulumeli sika Mnu. Nelson Chamisa, owebalandla leCitizens Coalition for Change, uthi bangene kukhetho lolu besenzela ukubona ukuba bazakwenza njani kukhetho ngomnyaka ozayo.
Izaqhubekela phambili imikhankaso yokhetho lwama by-elections kuze kufike usuku lokhetho lolu.