Izakhamizi zeMakorokoro eMangwe zifuna kubotshwe isakhamuzi okuthiwa sadlwengula abantwana labazukulu, okwenza umkakhe afulathele umuzi ayecatsha kwele Botswana.
Indoda le, uNdlovu, ukewabotshwa wahlala entilongweni okweminyaka emibili.
Izakhamizi zithi uqhubekela phambili edlwengula abazukulu njalo ukhuthaza ubukhohlakali obumangalisayo esigabeni lesi.
Sehlulekile ukukhuluma ngodaba lolu loNdlovu amapholisa, induna losobhuku. Bebengaphenduli omakhalekhukhwini.
Omunye wabantwana baka Ndlovu usanda kubotshelwa ukudlwengula isihlobo.
Isigaba seMakorokoro sesifuna ukususela uNdlovu amanqe nxa engasuswanga kuleyondawo ngamapholisa.
UNkosikazi Thabitha Mtobi Moyo Ndlovu, owabaleka emzini wakhe wayaphephela kwele Botswana, uthi kulihlazo okwenziwa ngumkakhe.
UNkosikazi Ndlovu uthi osobhuku, amakhansila, abalisa lenduna bayakwazi okwenzakala emzini wakhe.
UNkosikazi Ontibile Ndlovu Phuthi, ukhansila wesiga lesi, uyakusekela lokhu esithi sebekhathele ngokwenziwa ngundoda lo.
Lokhu kusekelwa nguMnu. Alfios Ndlovu, odabuka eMakorokoro, othi kumele uNdlovu avalelwe okwesikhathi eside entilongweni.
Okwamanje izakhamizi zixoxisana ngokumele zikwenze ngokutshetsha ebulenjini bokuxhumana obeWhatsApp.
