UMongameli Cyril Ramaphosa wakwele South Africa losikomishi wamapholisa esabelweni seGauteng sebekhuthaze iqula elizibiza ngokuthi Operation Dudula, elihamba lidinga abokuza abaselizweni ngokungekho emthethweni, ukuthi lekele ukwenza lokho ngoba akukho amthethweni.
Ekhuluma labezindaba izolo, uRamaphosa uthe uhulumende wakhe uyakwazi ukuthi kulabantu abahamba bengena ezindlini lemankampanini bedinga abantu bokuza abaselizweni ngokungekho emthethweni.
Uthe kufanele lumkhuba uphele njengoba lokhu kudala ukucwasana ngobuzwe njengoba abantu abaselizweni abavela kwamanye amazwe beza ngokutshiyeneyo.
“Akudingeki ukuthi abantu bafake umthethjo ezandleni zabo. Siyabazi abahlanyela inhlanyelo yokucwasana ngobuzwe.”
Esebuzwa ngabezindaba ukuthi uhulumende wakhe uzilungiselele yini nxa kungaqhamuka ixenophobia, uRamaphosa uthe abezomvikela balindile ukuqeda loba nhloboni yodlakela olungaqhamuka.
Kusenjalo usikomishi wamapholisa edolobheni leGauteng, uCommissioner Elias Mawela, uthi akukho emthethweni okwenziwa yileli qembu elizibiza Operation Dudula.
“Akulamuntu muntukazana ovunyelwa ukuhamba ebuza abantu ukuthi baselizweni ngokusemtehthweni kumbe hatshi.”
Usikomishi Mawela uxwayisa leli qula ukuthi lingaqhubeka lisenze njalo lizayifunda ivaliwe. “Ngixwayisa iqembu leOperation dudula ukuthi lekele ukwenza lokhu ngoba bengaqhubeka bazafica imbila zithutha.”
Amalunga eqembu le Operation dudula asekhona endaweni ezitshiyeneyo zelizwe. Lapho abahamba khona baxotsha abantu bokuza abathengisa emisikeni, ezitolo lemabhizimisini besithi imisebenzi abayenzayo ithathwe yizizalwane zakweleSouth Africa.
Ngempelaviki amapholisa acine esebenzisa intuthu ehitshayo lemota efafaza abantu ngamanzi ngesikhathi amalunga aleli qembu ezama ukungena eHilbrow, Yeoville leOrange Gorve.
Kodwa-ke okhokhela leli qembu, uMnu. Nhlanhla Lux Dlamini, uthi kusobala ukuthi amapholisa athola intshontsho kwabokuza laba yinto engababophi nxa besephula umthetho.
UDlamini uthi akumangalisi ukubona iziphathamandla zikahulumende zingabiyingxenye yohlelo lwabo ngoba azazi inhlupho ezibhekana lomphakathi malanga wonke.
Lamhlanjeke akasatholakalanga ukuthi aphawule ngokuthi basazoqhubeka na ngenhlelo zabo ngemva kwesixwayiso samapholisa loRamaphosa.
Inengi lezizalwane zeZimbabwe selemukele ngenjabulo inkulumo kaRamaphosa lamapholisa lobanje bekhona abantu kuvamile ukuthi uhulumende aqine emlonyeni kodwa acine engasenzanga lutho.