Abatsha eZimbabwe bakhala ngokuswela izithupha ezifunwa yikhomishini eyeZimbabwe Electoral Commission (ZEC) ngesikhathi bebhalisela ukuvota kukhetho oluzaqhutshwa ngomnyaka ozayo.
Labo abenenisa ukubhalisele ukuvota kulez’insuku kabasoze benelise ukuvota kukhetho lwama by-elections oluzakwenziwa mhlaka 26 Mbimbitho lonyaka.
Omunye wabatsha ongasoze abhalisele ukuvota nguJabulani Mdlongwa, ohlala koBulawayo.
"Mina kangisoze ngibhalisele ukuvota ngoba kangilasithupha. Sifunwa yiZEC. Sengazama lokuya koMsiteli kodwa kukhanya bethatha inani labantu abalutshwana ngelanga.”
ULungile Maseko, ohlala eMahatshula koBulawayo, ukusimo esifanayo.
"Mina ngehlulekile ukuyabhalisela ukuvota ngoba angilasithupha. Ngahamba koMsitheli ngisiyathatha isithupha bathi kumele ngibuye lomuntu omdala ezongisayinela. Ngapha mina ngile29 years, angikabi lesithupha.”
Omunye wabo nguSenzeni Mlotshwa, ohlala eMakhandeni koBulawayo. Uthi iZimbabwe Electoral Commission kayivumi ukubhalisa abangelazithupha. Uthi eyinye inkinga abhekane layo yikuthi kabalancedo abantu abavotelwayo.
"Ukuvota ngilesifiso sokuvota, siwavotele sibili amaMPs ethu. Kodwa inkinga esibalayo singaze sithi siyabavotela, kabasincedisi ngalutho. Abasincedisi. Kodwa hayi, akulahlupho sizavota.”
Kulabanye njalo abangazi lutho ngokuvota. UNomusa Tshabalala, ohlala eKambuzuma eHarare, ngomunye wabo.
"Mina njenge youth angenelisanga ukuthi ngiyebhalisa ukuthi ngivote ngoba angikwazi ukuthi kuvotwa njani. Angifundiswanga ngokuvota but ngilelungelo lokuthi ngiyevota."
UBhekimpilo Dube, ohlala eBudiriro eHarare, uthi akasiboni isizatho sokuvota.
Kasenelisanga ukukhuluma leZEC ngodaba lolu. Abatsha yibo abanengi kwele Zimbabwe abathenjwe ngabezombusazwe ngesikhathi sokuvota.