Kuqhamuke ingxabangxoza eCowdray Park edolobhenilakoBulawayo kwaze kwangenela amapholisa ngemva kokuba izakhamizi zisole uKhansila walindawo uMnu. Kidwell Mujuru, ukuthi kungani evumele inkampani yeHarare ukuthi kube yiyo ezokwakha ikilinika endaweni eyaziwa ngokuthi kuse eMpompini njalo iqhatsha izisebenzi ezingaveli koBulawayo kumbe eMatabeleland.
UMnu. Phiri, obona ngokuqhutshwa kwenhlelo kunhlanganiso elwela ilungelo loluntu eye Mthwakazi Residents Association, uthi bananzelele ukuthi izisebenzi zaleyonkampani azenelisi ukukhuluma indimi zeMatabeleland, njalo bebedinga indlu yokuhlala bendawonye, kukanti bebesiya ngaphandle egcekeni.
UMnu. Mujuru uthi ngempela inkampani esebenza eCowdray Park ivela eHarare njalo ubize amapholisa ukuthi avikele izisebenzi ngoba zimtshayele ucingo zamazisa ukuthi zesabela impilo yazo.
Uthi laye uyayisola linkampani ngoba bekufanele iqhatshe izisebenzi zakoBulawayo kodwa izaqhubeka isebenza ngoba isivele yathola i-tender.
Utshele uSithandekile Mhlanga weStudio 7 ukuthi nguye okhethayo izisebenzi njalo ukhulumisana leyinye inkampani evela phandle kweMatabeleland ku ward yakhe ngemva kwesikolo seTategulu ukuthi iqhatshe abantu bakulindawo.