Inhlanganiso emela izisebenzi, iZCTU, ithi abaqhatshi kumele balandele isixwayiso sekhomishini yamalungelo oluntu, iZimbabwe Human Rights Commission, esokuthi amankampani kahulumende kanye lazimeleyo akumelanga baphoqe izisebenzi ukuthi zihlatshwe ijekiseni yeCovid-19 nxa zingafuni.
Likhomishini ithe ukwenza lokhu yikwephula amalungelo oluntu.
Kumbiko ewethule izolo, ikhomishini le ithe abaqhatshi kumele bahlonipho iziqondiso seWorld Health Organization ezikubeka sobala ukuthi abantu kumele bazikhethele ukuthi bayafuna na ukuhlatshwa kumbe kabafuni.
Yengeze yathi ikhathazekile kakhulu ngembiko yokuthi kulabanye abaqhatshi asebebambela izisebenzi ezingahlatshwanga iholo kanye labanye asebevimba izisebenzi lezi ukuya emsebenzini.
Lokhu kufakazwe ngunobhala jikelele weZCTU, uMnu Japhet Moyo.
Igqwetha likaMongameli Emmerson Mnangagwa uMnu Tinomudaishe Chinyoka utshele iStudio 7 ukuthi uhulumende kabambi izisebenzi zakhe ngamandla ukuthi zihlatshwe.
Kodwa uthe uyenelisa ukukwenza lokho kungaba lesidingo ukuze kwenqatshelwe ukubulawa kwabantu yi-coronavirus.