Inhlanganiso yeSwaziland Solidarity Network isikhuthaze izizalwane ze eSwatini ukuthi zilethe obunye njalo ubufakazi obutshengisa ukuthi uhulumende walelolizwe ulolunya, kulandela ukubhubha lokulimala kwabantu abatshengiselayo kulelolizwe besola abathi yikwephulwa kwelungelo loluntu.
Embikweni owethulwe ngoLwesibili ntambama, inhlanganiso le iduduze labo abafelwe yizihlobo labangane, njalo yathi kufanele inkosi ye eSwatini uKing Mswati Wesithathu ijeziswe ngoba abantu bebetshengisela ngokuthula, kodwa bahlukuluzwa libutho lamapholisa.
I-Swaziland Solidarity Trust iphinde yakhalaza ukuthi umanyano weSADC, African Union kanye loweUnited Nations uqhube uphenyo ngokwenzakala eSwatini, njalo ingcwethi zakwamanye amazwe ezikulelolizwe lazo ziphathise ngolwazi lokwenzakalayo.
Osaphethe isikhundla senhloko kahulumende we eSwatini, uMnu. Themba Nhlanganiso Masuku ubikwa esanda ukutshela izizalwane zakulelo ilizwe ukuthi zingabangeli udlakela, wazithembisa ukuthi bazakhulumisana lazo ngenjongo yokuxazulula ingxaki ezikhona elizweni labo.
Okunengi ngaloludaba, asikuzweni kungxoxo uSithandekile Mhlanga weStudio 7 ayiqhube lesikhulumeli seSwaziland Solidarity Trust, uMnu. Lucky.
