Imbiko yosaphethe isikhundla sokuba ngunobhala obona ngezokukhananga usekelo lwebandla le Zanu PF, uMnu. Patrick Chinamasa, eyokwethusela abomsakazo we VOA Studio 7 kanye lenhlanganiso ezisebenzisana lozulu elizweni isolwe ngabanye.
Embikweni wakhe awethulele intathelizindaba ngesikhathi engena umhlangano lazo emahofisini esigodlo seZanu PF e Harare uChinamasa uchaze umsakazo we Studio 7 njengomsakazo osebenzisana lohulumende wakweleMelika ukufeza izifiso zalelo lizwe okubalisela ukufakela inkokheli ekuZanu Pf lohulumende izijeziso zomnotho.
Imbiko kaChinamasa isolwe ngabanengi okubalisela abenhlanganiso ezisebenzisana lentathelizindaba ezisasacathulayo eye Young Journalists Association Zimbabwe - YOJA.
Isikhulumeli salenhlanganiso uLeopold Munende upha umbono wenhlanganiso le kunkulumo kaChinamasa.
“Okukhulunywe nguChinamasa ngomsakazo weStudio 7 kutshengisa ukuthi iZanu Pf, ayihloniphi amalungelo entathelizindaba, bafuna intathelizindaba zibe zibhala kumbe zikhipha lokho abakufunayo. Okwenziwa yiStudio 7, asikaboni iStudio 7 iqamba amanga, asikaboni iStudio 7 ibhala ngeyinye indlela esingathi ayisiyo yentathelizindaba. ”
UMunhende uthi inkulumo kaChinamasa isibatshayisa ngovalo labo njengentathelizindaba ezisacathulato.
“ UChinamasa yena usola ukuthi iStudio 7 ibhale iqiniso abangafuni ukuthi lazakale. Sesethusela intathelizindaba, kuyabe kunga kungasasebenzeki. Thina njengentathelizindaba ezincane, lokhu kuyasethusa ngoba lathi siyabe sesisesaba ukuthi singabhala indaba abangazifuniyo bona, lathi sizathethiswa and uvela thethiswa asazi lokuthi yikuyini okuzenzakala phambili. ”
Obona ngezokucubungula ezombusazwe ngaphansi kwenhlangniso ye Zimbabwe Democracy Institute umnumzana Bekezela Gumbo laye upha umbono wakhe.
“Engingakutsho engikubonayo lapha, elizweni kumbe esingakubiza ngokuthi yo Authoritarian Regime, singakhangelela noma yini, you can expect anything. Singakhangelela noma yini, noma yini ingayenzeka. Njengoba ngitshilo ukuthi iZimbabwe Democracy Institute ihlala ikhuluma ukuthi iZimbabwe isenkingeni yalokho okubizwa kuthiwa yi Competative Authoriatarian Regime. ”
Ke sizwe isikhulumeli sikahulumende umphathintambo wezokukhitshwa kwemibiko, unkosikazi Monica Mutsvangwa ekhuluma phezu kwaloludaba:
“Buza yena, angithi nguye okhulumileyo, mina angazi lutho. Ngiyisikhulumeli sikahulumende mina, angizange ngitsho lutho njalo angikwazi lokho okubuzayo. ”
Umsakazo we Studio 7 wethule umbiko othi phansi kwendikimba yenhlanganiso ye Voice Of America, umsakazo we Studio Seven usakaza indaba ezingasekeli hlangothi njalo eziqotho.
Indaba ze Studio Seven zithembekile njalo lumsakazo ukhuthaza ingxoxo eziqakathekileyo, eziqotho ngokwenzakala kuzwekazi le Africa, kweleMelika lomhlaba jikelele.
