Umthethwandaba ophakemeyo, owe Supreme Court usuze wakhulula abasekeli be MDC ababili abathi u Tungamirai Madzokere, owayengu khansila, lo Last Maengahama kade bevalelwe ejele okweminyaka eyisitshiya ngolumbili besetheswa icala lokubulala ipholisa.
Umthethwandaba lo uthe ababili laba kumele bakhululwe namhlanje enkantolo ye Chikurubi Maximum Prison lapho ababevalelwe kusukela ngomnyaka ka 2012 baze bagwetshwa ngomnyaka ka 2016.
Amagqwetha amela ababibili laba abe engaphansi kwenhlanganiso yamagqwetha alwela ilungelo likazulu eye Zimbabwe Lawyers for Human Rights. Amagqwetha la agoqela uNkosikazi Beatrice Mtetwa lo Mnu Charles Kwaramba ndawonye lo MnU Gift Mutisi.
Isinqumo esethulwe ngabahluleli abathi uRita Makarau, Susan Gwaunza lo Susan Mavangira siveza ukuba isigwebo abasiphiwayo sibekwe eceleni lokuba akulabufakazi bokuthi yibo ababulala ipholisa leli, uInspector Petros Mutedza.
Ababili laba babebotshwe bebane lo Nkosazana Yvone Musarurwa, owakhululwa ngomnyaka ka 2018 phansi kohlelo lukahulumende olwaxolela izibotshwa zesifazane. Owesine, uPhineas Nhatarikwa, wabhubha esesitokisini.
Lokhu kujabulise abanengi, ababalisa isikhulumeli se MDC-T ekhokhelwa ngu Mnu Douglas Mwonzora, uWitness Dube yena othi ukubotshwa kwabo kwakungamelanga kwenzakale.
“ Njengebandla siyakwamukela ukukhululwa kwababili laba. Sizakhumbula ukuthi icala labo ababeletheswa lasukela eziphithiphthini ze politics. Ngakho silusizi kakhulu kumuli eyalahlekelwa lipholisa leli”
Lokhu kusekelwe ngu mmeli we Hwange Central engowe MDC Alliance, uMnu Daniel Molokele.
“ Namhla lilanga lenjabulo le ntokozo, siyajabula ukuba idale likhululela ababili laba ngecala abangazange balenze. Sibonga kakhulu bonke abasebenze gadalala iminyika yonke le ukuthi ababili laba bakhululwe”
Olwela amalungelo oluntu uMnu Pride Mkono uthi kumele ababili laba base uhulumende emthethwandaba babhadalwe imali yokubotshelwa amanga.
“ Ukukhutshwa kwabo yinto ejabulisayo kakhulu, lapho abakade benikwa icala lamanga. Bekungela bufakazi bokuthi icala leli balenza. Sikhangelele ukuthi kumele base uhulumende emadale nxa bengaphuma”
Loba nje ubufakazi babucaca ukuba ababili laba kabala cala okwazwisa ubuhlungu yikuthi umthethwandaba we High Court wabafumana bele cala lokubulala umuntu.
Okwadanisa uLast Maengahama yikuthi ngelanga okwenzakala khona udaba lolu wayesenkozweni eye United International Family Church ekhokhelwa ngu mfundisi Makandiwa, wakhipha ubufakazi bomfanekiso kamabonakude kodwa abuzange bumsize.
UMsarurwa wathi ekhululwe waya kubandla leMDC-T esithi ibandla leMDC Alliance lalingabananzi besejele.
Umbuzo osukhona ngothi ababili laba bazakuya kweliphi ibandla njengoba bavalelwa ejele ibandla lingadabuki phakathi?
